Xarunta Guddoonka iyo Guddiyada ee Villa Hargeysa waxaa maanta kulan ku yeeshay Guddiga joogtada ah ee Golaha Shacabka JFS iyo Guddiga joogtada ah ee Golaha Wakiilada ee Dowlad Goboleedka Puntland, waxaana kulanka shir Guddoominayay Guddoomiyaha Golaha Shacabka Mudane Maxamed Sheekh Cusmaan Jawaari, waxaana kulanka ka qeyb galay Guddoomiyaha Golaha Wakiilada Puntland Mudane Axmed Cali Xaashi.
Kulanka ayaa inta uu socday waxaa looga hadlay wada shaqeynta golayaasha sharci dejinta ah, waxaana Guddoomiye ku-xigeenka labaad ee Golaha Shacabka Mudane Mahad Cabdalla Cawad oo kulanka furitaankiisa ka hadlay uu sheegay golayaasha sharci dejinta ay saarantahay mas’uuliyad gaar ah maadaamaa shacabka ay metelaan.
Guddoomiyaha Golaha Wakiilada ee Dowladda Goboleedka Puntland Mudane Axmed Cali Xaashi ayaa sheegay in ka Puntland ahaan ay dhiyaar u yihiin in la horumariyo Hay’adaha sharci dejinta ee Dalka.
Guddoomiyaha Golaha Shacabka ee Jamhuuriyadda Federaalka Soomaaliya Mudane Maxamed Sheekh Cusmaan Jawaari ayaa sheegay in waxyaabaha loobahanyahay in xooga la saaro ay tahay kala saarista awoodaha Dowladda Federaalka iyo Dowlad Goboleedyada iyo arrimaha dhameystirka Dastuurka, taasina ay ku imaan karto in wada shaqeyn dhow ay yeeshaan Golayaasha sharci dejinta ee Dalka.
Geba gabada kaddib ayaa xoghayaha guud ee golaha shacabka Mudane Cabdikariin Xaaji Cabdi Buux waxa uu Warbaahinta Qaranka u sheegay in uu guul ku soo dhamaaday kulanka ajendihiisa uu ahaa la kulanka Guddiga joogtada ah ee Golaha Wakiilada Puntland.
