Guddoomiyaha guddiga madaxa banaan ee la dagaallanka Musuq maasuqa Abuukaate Maxamed Xuseen Xaamud oo la hadlay Radio Muqdisho ayaa ka hadlay qorshayaasha ay hiigsanayaan oo ay ugu horeyso sidii loola dagaalami lahaa musuq maasuqa.
Abuukaate Maxamed ayaa xusay in dhismaha guddigan uu soo bilowday 2018, haatanna ugu dambeyn lagu guuleystay in la dhameystiro, iyadoo loo maray habraacyadii saxda ahaa, uuna ku faraxsanyahay xilka maanta loo doortay.
“Shaqooyinka na horyaala waxaa ka mid ah in la baaro caddeymaha ku aadan musuq maasuqa lagu soo oogo saraakiisha dowladda, waxaana uu guddiga awood u leeyahay in uu baaro hay’adaha sida gaarka ah loo leeyahay iyo kuwa caalamiga ah intuba, Musuqa lacag kaliya ma galo ee dhanka maamulka ayuu geli karaa iyo arrimo kale”ayuu yiri Guddoomiyaha guddiga Madaxa Banaan ee la dagaallanka musuq maasuqa.
Guddoomiyaha guddiga madaxa banaan ee la dagaallanka Musuq maasuqa ayaa sheegay inay xoojin doonaan isla xisaabtanka dhamaan hay’adaha dowladda, isla markaana ay la socon doonaan dhaq dhaqaaqa maamulka, si looga hortago musuq maasuqa.
Abuukaate Maxamed Xuseen Xaamud Guddoomiyaha guddiga madaxa banaan ee la dagaallanka Musuq maasuqa ayaa tilamamay in wada shaqeyn buuxda ay la yeelan doonaan hay’adaha garsoorka cadaaladda iyo hanti dhowrka Qaranka.
