Guddoomiyaha Hay’adda Qaxootiga iyo Barakacayaasha Qaranka Soomaaliyeed, Liibaan Cabdi Cigaal, ayaa magaalada Muqdisho kulan kula yeeshay Jeremy Konyndyk, Madaxweynaha Hay’adda Caalamiga ah ee Qaxootiga (Refugees International), iyo Cabdullaahi Boru Halakhe, oo ah U-doodaha Sare ee Bariga iyo Koonfurta Afrika ee hay’adda.
Kulanka ayaa looga hadlay xaaladda qaxootiga ku sugan Soomaaliya iyo dadka Soomaaliyeed ee gudaha ku barakacay, gaar ahaan caqabadaha bani’aadantinimo iyo baahiyaha sii kordhaya ee haysta dadka ay saameeyeen barakaca iyo xaaladaha adag ee dalka.
Labada mas’uul ee ka socda Hay’adda Caalamiga ah ee Qaxootiga ayaa magaalada Muqdisho u yimid inay u kuurgalaan saameynta ka dhalatay dhimista iyo jarista qaar ka mid ah deeqihii iyo taageeradii bani’aadantinimo ee lagu caawin jiray qaxootiga iyo barakacayaasha ku sugan Soomaaliya.
Dhimista dhaqaalaha iyo taageerada ayaa saameyn ku yeelatay howlaha gargaarka, iyadoo qaar ka mid ah hay’adaha Qaramada Midoobay iyo Mareykanku ay dhimeen ama jareen qaar ka mid ah maalgelintii iyo taageeradii loo fidin jiray dadka nugul.
Intii uu kulanku socday, Guddoomiye Liibaan Cabdi Cigaal ayaa mas’uuliyiinta la wadaagay xaaladda ay ku sugan yihiin qaxootiga iyo barakacayaasha Soomaaliyeed, isagoo si gaar ah uga hadlay saameynta iyo caqabadaha ka dhashay hoos u dhaca dhaqaalaha iyo gargaarka bani’aadantinimo ee loogu talagalay dadka nugul.
Sidoo kale, waxaa kulanka lagu soo bandhigay baahiyaha muhiimka ah ee haysta qaxootiga iyo barakacayaasha, iyadoo xoogga la saaray muhiimadda ay leedahay in la sii wado taageerada bani’aadantinimo iyo in la helo xalal waara oo wax looga qabanayo duruufaha ay ku nool yihiin.
