Maxkamdda Ciidamda Qalabka Sida ayaa soo bandhigtey kiisaska ay qabatay sanadkii 2018-ka kaasoo la xiriira fal dambiyeedyada ay geystaan Argagixisada dalka ka dagaallanta.
Guddoomiyaha Maxkamadda darajada 1aad ee ciidamada qalabka sida Gaashaanle Sare Xasan Cali Nuur Shuute oo u waramay Warbaahinta Qaranka ayaa sheegay in dacwadaha ay qaaday Maxkadda sanadkii tegay uu yahay 194, isagoo intaa ku daray in loo xiray 291 ruux oo isugu jirta Al-Shabaab iyo Daacish, isla markaana xukuno kala duwan lagu fuliyay.
“Maxkamadda sandkii 2018 waxaa la keenay galdacwadeedyo lala xiriirinayo argagixisada oo gaaraya 194, oo loo xiray 291 ruux oo lala xiriirinayo inay ka tirsanaayeen ururka Al-Shabaab iyo Daacish, maxkamadda kuwaasi xukuno kala duwan ayay ka soo saartay, qaar dambiyada ayaa lagu waayay, qaar xabsiyo dhaadheer ayay ku muteysteen hadba sida ay dambiyada ugu hor cadaadeen maxkamadda horteeda” ayuu yiri Gaashaanle Sare Xasan Cali Nuur.
Guddoomiyaha Maxkamadda Darajada 1aad ee ciidamada qalabka sida ayaa intaa ku daray “Waxaa sidoo kale kaalinta 2aad ahayd dambiyada lala xiriirinayo dilka, maxkamadda waxaa la keenay 94 gal dacwadeed oo la xiriirta in dil loo geystay shacab ama ciidan, kuwaasi oo ka kala dhacay gobollada ama magaalada Muqdisho, gal dacwadeedyadaas 94-ta ka kooban waxaa loo xiray 153 ruux qaar ciidanka ayay ka tirsanaayeen qaarna kooxaha argagixisada ayay ahaayeen go’aano ayaana ka soo baxay”.
Gaashaanle Sare Xasan Cali Nuur Shuute ayaa mar uu ka hadlayay is rasaaseynta ciidamada dhexdooda waxa uu ku jawaabay in arintaas go’aano adag laga soo saaray.
