Waxaa maanta magaalada Muqdisho ka dhacday munaasabad rasmi ah oo lagu saxiixay heshiis iskaashi oo muhiim ah, kaas oo u dhexeeya shirkadda isgaarsiinta ee Hormuud Telecom iyo hay’adda caalamiga ah ee Save the Children, ujeeddadiisuna tahay horumarinta adeegyada bini’aadantinimo iyo isgaarsiinta ee la gaarsiinayo carruurta Soomaaliyeed.
Munaasabadda waxaa si rasmi ah uga qeyb galay Guddoomiyaha Hay’adda Maareynta Masiibooyinka Qaranka (SoDMA), waxaana kale oo kasoo qeyb galay Ra’iisul Wasaare ku-xigeenka Labaad ee dalka, wasiirro ka tirsan Xukuumadda Federaalka, iyo mas’uuliyiin kale oo heer qaran ah.
Heshiiskan ayaa diiradda saaraya sidii carruurta Soomaaliyeed ay u heli lahaayeen adeegyo isgaarsiineed oo casri ah, gaar ahaan telefoonada smart-ka, si ay uga faa’iideystaan dhowr adeeg oo muhiim ah, oo ay ka mid yihiin,Dhegeysiga wacyigelinta xaaladaha degdegga ah (Emergency Alerts) si ay uga war hayaan masiibooyinka, colaadaha iyo khataraha kale ee soo wajaha bulshada, Helitaanka kaalmooyinka bini’aadantinimo: iyadoo loo marayo nidaamyo dijitaal ah oo fududeynaya gaarsiinta taageerada, Waxbarashada online-ka ah: taas oo si gaar ah muhiim ugu ah carruurta ku nool meelaha ay adag tahay in waxbarasho rasmi ah lagu helo, Shaqo abuur dhalinyarada Soomaaliyeed: iyadoo Hormuud Telecom ay qorsheyneyso in fursado shaqo la siiyo dhalinyarada, gaar ahaan kuwa bartay ama xirfad u leh dhanka tignoolajiyada, Heshiiska waxaa si buuxda loogu saleeyay barnaamijka horumarinta qaranka ee National Transformation Plan (NTP) ee Dowladda Federaalka Soomaaliya, kaas oo dhiirrigelinaya adeegyo la tayeysan, ku saleysan tignoolajiyad iyo iskaashi dhex mara dowladda, hay’adaha caalamiga ah, iyo ganacsiga gaarka loo leeyahay.
Guddoomiyaha Hay’adda SoDMA, oo goobta ka hadlay, ayaa si weyn u bogaadiyay heshiiskan, isagoo tilmaamay in uu yahay tallaabo muhiim u ah horumarinta fursadaha carruurta iyo dhalinyarada Soomaaliyeed, gaar ahaan kuwa wajahaya duruufo adag. Wuxuu xusay in heshiiskan uu yahay tusaale wanaagsan oo muujinaya sida loo mideyn karo hal-abuurka ganacsiga iyo howlgalka samafalka si loo gaarsiiyo adeegyo nolosha badbaadin kara.
