Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macallin Cabdulle, ayaa xafiiskiisa ku qaabilay Madaxa Hay’adda Caafimaadka Adduunka (WHO) ee Soomaaliya, Dr. Humphrey.
Kulanka ayaa diiradda lagu saaray xoojinta wada-shaqeynta labada hay’adood, gaar ahaan diyaar-garowga iyo sidii si wadajir ah looga jawaabi lahaa xaaladaha bani’aadannimo iyo caafimaad ee ka dhasha fatahaadaha, El Niño iyo cudurrada faafa.
Sidoo kale, waxaa laga wada hadlay sidii loo xoojin lahaa isku-duwidda gurmadka, qorsheynta iyo diyaar-garowga, iyo sidii taageero caafimaad iyo mid bani’aadannimo loo gaarsiin lahaa bulshada ay saameeyeen musiibooyinka.
Guddoomiyaha Hay’adda SoDMA, Mudane Maxamuud Macallin Cabdulle, ayaa uga mahadceliyay WHO kaalinta ay ka qaadato adeegyada caafimaadka iyo gurmadka bani’aadannimo ee Soomaaliya, isagoo ku booriyay in la sii laba-jibaaro dadaallada lagu taageerayo bulshada Soomaaliyeed, gaar ahaan xilliyada ay dalka ka jiraan xaaladaha bani’aadannimada iyo caafimaadka.
