RADIO MUQDISHO(JABUUTI):-Guddoomiyaha Xiriirka Kubadda Cagta Soomaaliya Cali Cabdi Maxamed, ayaa si rasmi ah loogu doortay xilka Madaxweyne Ku-xigeenka Ururka Kubadda Cagta Bariga iyo Bartamaha Afrika ee (CECAFA), ka dib Shirweynaha Guud ee doorashada CECAFA oo ka dhacay dalka Jabuuti.Shirkan waxaa ka qaybgalay madax ka kala socday FIFA, CAF, iyo CECAFA.
Guusha Guddoomiyaha Cali Shiine ayaa ka tarjumeysa kalsoonida ay xiriirrada xubnaha ka ah CECAFA ku qabaan hoggaankiisa, kartidiisa, iyo doorka firfircoon ee Xiriirka Kubadda Cagta Soomaaliya ku leeyahay horumarinta kubadda cagta gobolka.
Xilka cusub ee loo doortay oo ah Madaxweyne Ku-xigeenka CECAFA muddo xileedkiisuna yahay afar sano, ayaa la filayaa inuu xoojin doono iskaashiga dalalka xubnaha ka ah CECAFA, isla markaana uu gacan ka geysan doono horumarinta tartamada, tababarrada, iyo maamulka kubadda cagta ee Bariga iyo Bartamaha Afrika.
