Guddoomiyaha Baarlamaanka Federaalka Soomaaliya Mudane Maxamed Sheekh Cusmaan “Jawaari” iyo wafdi uu hogaaminayo oo maanta gaaray magaalada Jowhar ee xarunta gobolka Shabeellada Dhexe ayaa ka qeybgalay Kalfadhiga 1aad ee Baarlamaanka Hirshabelle kulankiisii 1aad ee aan caadiga aheyn oo ay Xildhibaannadu ku dooranayeen Guddoonka Baarlamaankooda.
Guddoomiyaha Baarlamaanka waxaa wehliyey Wasiirka Arrimaha Gudaha iyo Federaalka Xukuumadda Soomaaliya,Xildhibaannada Baarlamaanka Federaalka Soomaaliya ee kasoo jeeda labada gobol ee Hiiraan iyo Shabeellada Dhexe waxaana uu Guddoomiyaha iyo mas’uuliyiinta la socday ay goobjoog u ahaayeen sida ay doorashadu u dhacday.
Khudbad uu ka jeediyey Munaasabadda doorashada kadib ayuu Guddoomiyaha Baarlamaanka Federaalka Soomaaliya Mudane Maxamed Sheekh Cusmaan “Jawaari” ku ammaanay dadaalka iyo dhabar adeyga ay muujiyeen odayaasha iyo waxgaradka labadan gobol sidoo kalena Wasaaradda Arrimaha gudaha iyo urur goboleedka IGAD ayuu bogaadiyey dadaalka ay ku bixiyeen dhismaha maamulka Hirshabelle waxaana uu u hambalyeeyey Guddoonka Baarlamaanka Hirshabelle ee la doortay.
Ugu dambeyn Guddoomiyaha Baarlamaanka Federaalka Soomaaliya waxa uu ugu baaqay Baarlamaanka maamulka Hirshabelle oo hada howsha dhameystirka dhismaha maamulka ay hortaallo iney ka shaqeeyaan sidii loo qancin lahaa qof kasta oo ka maqan madashan ee wax tabanaya waxaana uu u rajeeyey iney ku guuleystaan howshooda, tallaabadanna ay muujineyso sida ay Soomaaliya uga go’an tahay hirgelinta nidaamka Federaalka.
Dhinaca kale Guddoomiye Jawaari ayaa kulammo gaar gaar ah kula qaatay magaalada Jowhar odayaasha iyo waxgaradka gobollada Hiiraan iyo Shabeellada Dhexe qaarkood iyo xildhibaanno ka tirsan Baarlamaanka Federaalka Soomaaliya waxaana kulammadaasi dhammaantood ay ahaayeen kuwo uu ku dhageysanayey qeybaha bulshada isaga oo xaafadaha qaarna ku booqday waxgaradka.
—-DHAMMAAD—
Xafiiska Warfaafinta iyo Xiriirka Dadweynaha Ee Guddoonka Baarlamaanka
Media and Public Relation Office Of Speaker
