Furitaanka Kulankan wadahadalka ah ee la doonayo in lagu xalliyo xiisadaha siyaasadeed ee ka dhashay mowshin ay Xildhibaanno ka tirsan Baarlamaanka ka soo gudbiyeen Madaxweynaha 12-kii August 2015 waxaa goobjoog ka ahaa Ra’isulwasaaraha Xukuumadda Federaalka Soomaaliya Mudane Cumar C/rashiid Cali Sharma’arke iyo Xildhibaanno ka tirsan Baarlamaanka.
Guddoomiyaha Golaha Shacabka Jamhuuriyadda Federaalka Soomaaliya Mudane Maxamed Sheekh Cusmaan “Jawaari” oo furitaankii kulanka ka hadlay ayaa uga mahad celiyey Xildhibaannada Baarlamaanka sida ay u aqbaleen ka qeybgalka wadahadalka, waxaana uu si rasmi ah ugu dhawaaqay in wadahadalku furan yahay.
Ra’isulwasaaraha Xukuumadda Federaalka Soomaaliya Mudane Cumar C/rashiid Cali Sharma’arke oo isaguna furitaankii kulanka hadal kooban ka jeediyey ayaa uga cudur daartay Xildhibaannada dib u dhaca kulankii kan ka horreeyey waxaana uu xusay in uu diyaar u yahay in uu dhageysto aragtida Xildhibaannada.
Xildhibaannada Baarlamaanka ee kasoo qeybgalay kulanka oo ka dhacay xarunta guddoonka golaha Shacabka ee Villa Hargeysa ayaa iyagu muujiyey aragtiyo kala gedisan, Xildhibaannada qaar waxa ay muujiyeen in wadahadalka lasoo gebagebeeyo maaddaama uu guddoonka Baarlamaanka horey u sheegay in Mooshinka la soo afjaray si loo sii amba qaado dhameystirka howlaha dowladda u yaalla.
Guddoomiyaha ayaa ugu baaqay in ay ka soo qeyb galaan shirka dhinacyada ka maqan, waxaana uu intaa ku daray in guddoomiyaha iyo Ra’iisul wasaaraha isla meel dhigi doonaan talooyinkii ka soo baxay shirkii maanta.
Muddada kooban ee la heysto, qaar kale oo Xildhibaannada ahna waxa ay qabeen inaan wadahadalka las oo afjarin oo uu sii socdo ayadoo Madaxweynaha uu kasoo qeybgalayo balse mowshinka ay tahay in la soo gunaanudo ayadoo aragtidaasina ay muujiyeen xubno ka mid ahaa saxiixayaashii mowshinka halka aragtida seddexaadna ay tahay in mowshinkan uu guddoonku u maareeyo sifo sharciga waafaqsan oo ah in ugu dambeyn cod lagu kala baxo.
