Guddoomiyaha Golaha Shacabka Jamhuuriyadda Federaalka Soomaaliya Mudane Maxamed Sheekh Cusmaan “Jawaari” ayaa magaalada Muqdisho ku qaabilay Safiirrada dowladaha Norway iyo Turkey u fadhiya magaalada Muqdisho.
Kulankii ugu horeeyey waxa uu Guddoomiyaha Golaha Shacabka la qaatay danjiraha Dowladda Norway u qaabilsan Soomaaliye Danjire Mr Victor Ronneberg oo uu wehliyey Ergeyga gaarka ah ee Dowladda Norway u qaabilsan Soomaaliya Mr Jens Mjaugedal waxaana uu kala hadlay iskaashiga dhinacyada siyaasadda, dhaqaallaha iyo hormarinta ee labada dal iyo in dowladda Norway ay Soomaaliya ka taageerto xoojinta Dimuqraadiyadda iyo hirgelinta nidaamka Axzaabta Siyaasadda.
Dhinaca kale Guddoomiyaha Golaha Shacabka waxa uu xafiiskiisa ku qaabilay Danjiraha dowladda Turkiga u fadhiya magaalada Muqdisho Danjire Olgan Bekar waxaana uu Guddoomiyaha kala hadlay safiirka dedejinta dhismaha guddiyada saaxiibtinimo ee labada Baarlamaan iyo in sidoo kale la dedejiyo dhismaha Xarunta Golaha Shacabka taasi oo ay walaalaha Turkiga Soomaaliya ka taageeri doonaan.
