Guddoomiye Ku-xigeenka koowaad ee Golaha Shacabka baarlamaanka Jamhuuriyadda Federaalka Soomaaliya Sacdiya Yaasiin Xaaji Samatar ayaa kulan la qaadatay Xildhibaannada haweenka ah ee ku jira golaha Shacabka ee baarlamaanka Dalka.
Ujeedka kulanka ayaa waxa uu ahaa is xogwareysi iyo hubinta qoondada ay haweenka ku leeyihiin xubnaha Soomaaliya ku matali doona baarlamaanka Urur Goboleedka Iskaashiga Dhaqaalaha Bariga Afrika, waxaana guddoomiye ku xigeenka koowaad ee Golaha Shacabka iyo xubnaha Xildhibaannada ah isla garteen ahmiyadda ay leedahay ilaalinta qoondada dumarka ee 30% iyo in la adkeeyo iyada oo haweenka kulanka ka qeyb galay ay aad u soo dhoweeyeen.
Ugu dambeyn guddoomiye ku xigeenka koowaad ee Golaha Shacabka Sacdiya Yaasiin Xaaji Samatar ayaa sheegtay in xubnaha sagaalka ah ee Soomaaliya ku matali doona Baarlamaanka urur goboleedka Iskaashiga Dhaqaalaha Bariga Afrika ay seddax ka mid ah dumar noqon doonaan isla markaana siyaasadda Ururka ay tahay in kor loo qaado awoodda siyaasadeed ee haweenka, ka guddoon ahaanna ay xaqiijin doonaan.
Kulanka sidoo kale waxaa ka qeyb galay xildhibaanno ka tirsan Baarlamaanka Urur Goboleedka Iskaashiga Dhaqaalaha Bariga Afrika oo qeyb ka ah wafdiga guddoomiyaha baarlamaanka ururkaasi ee booqashada ku jooga dalka.
