Guddoomiye ku xigeenka Labaad ee Baarlamaanka Federaalka Soomaaliya ayaa magaalada Muqdisho ku qaabilay wafdi ka socda hay’adda hormarinta mashaariicda u qaabilsan Qaramada Midoobay ee UNDP.
Kulanka uu Guddoomiye ku xigeenka Labaad ee Baarlamaanka Federaalka Soomaaliya Mudane Mahad Cabdalla Cawad la qaatay wafdi ka socda hay’adda Qaramada Midoobay u qaabilsan horumarinta mashaariicda ee UNDP, waxaa ku wehliyey Xoghayaha Guud ee Golaha Shacbaka Mudane Cabddikariin Xaaji Cabdi (Buux) waxaana kulanka looga hadlay taageerada ay hay’adda UNDP siiso Baarlamaanka Federaalka Soomaaliya.
Kulanka ayaa intii uu socday waxaa si gaar ah loogu eegay howlaha Guddiyada Joogtada ah ee Baarlamaanka horyaalla mudada u harsan madasha Baarlamaanka 9aad, dardar gelinta qorshayaasha lagu howlgelinayo xafiisyo uu Baarlamaanka Soomaaliya ku yeesho gobollada kale ee Dalka iyo in lasii xoojiyo taageerrada guddiyada iyo shaqaalaha Baarlamaanka ay hada hay’addu siiso.
Mudane Mahad Cabdalla Cawad Guddoomiye ku xigeenka Labaad ee Baarlamaanka Federaalka Soomaaliya ayaa uga mahad celiyey Hay’adda UNDP taageerrada joogtada ah ee ay siiso Baarlamaanka Federaalka Soomaaliya, gaar ahaan Guddiyada Joogtada ah ee Golaha Shacabka waxaana uu xusay iney lagama maarmaan tahay taageerrada ceynkan ah.
Dhinaca mas’uuliyiinta ka socotay hay’adda UNDP ayaa aad u ammaanay sida ay xiligan u socdaan howlaha Baarlamaanka Federaalka Soomaaliya si gaar ahna shaqooyinka guddiyada Joogtada ah ee Baarlamaanka ay qabtaan waxaana ay ballan qaadeen iney sii xoojin doonaan taageerradooda.
Hay’adda hormarinta mashaariicda u qaabilsan Qaramada Midoobay ee UNDP ayaa ka mid ah hay’adaha sida joogtada ah u taageera Baarlamaanka Federaalka Soomaaliya ayadoo kulankan uu Guddoomiye ku xigeenka Labaad ee Baarlamaanka la qaatayna uu muhiim u yahay sii xoojinta iyo wada shaqeynta labada dhinac.
