Guddoomiyaha Gobolka Banaadir ahna duqa Muqdisho Mudane Xasan Maxamed Xuseen “Muungaab” oo ay wehliyaan xubno ka tirsan maamulka gobalka iyo mas’uuliyiin kale ayaa maanta kormeeray waddada isku xirta Isgoysada Baar Ubax iyo Howlwadaag, halkaasi oo dhawaan la saaray laami casri ah.
Ujeedka kormeerka Guddoomiyaha Gobolka ayaa ahaa mid uu ugu kuurgalayay xaaladda suuqa bakaaraha, sida ay u socdaan howlaha ganacsi iyo dib u habeynta lagu sameeyay laamiga dhex mara suuqaasi.
Guddoomiyaha Degmada Howlwadaag Axmed Nuur Cabdi Siyaad oo la hadlay Wabraahinta ayaa guddoomiyaha gobolka banadir iyo xubnii la socday uga warbixiyay xaaladda suuqa bakaaraha iyo dhismaha waddadasi, isagoo ganacsatada ka dalbaday inay bixiyaan canshuurta.
Guddoomiyaha Gobolka Benaadir ahna duqa Muqdisho Mudane Xasan Maxamed Xuseen “Muungaab” ayaa sheegay in dowladda hoose ee xamar oo kaashanaysa ganacsatada suuqa Bakaaraha ay ku guuleysteen in waddo 1-km ah oo dhexmarto Suuqaasi ay laami saaraan.
“Tani waxa ay muujineysaa in aan nahay dad wax qabsan kara, waxaan markale ku celinayaa baaqii ahaa “Dhiso dalkaaga oo uu horey Madaxweyne Xasan Sheekh ku dhawaaqay” ayuu yiri Guddoomiye Muungaab.
24 sano kaddib ayay noqoneysaa markii laami casri ah la saaray wadada isku xirta Isgoysyada Baar Ubax iyo Howlwadaag, halkaasi oo ay dhibaatooyin ku qabeen ganacsatada iyo dadka kale ee ka adeeganaya suuqa bakaaraha.
Sawir Qaade:-Jabiiba
