Guddoomiyaha KMG ah ahna Guddoomiye kuxigeenka Koowaad ee Golaha Shacabka Baarlamaanka Jamhuuriyadda Federaalka Soomaaliya Marwo Sacdiya Yaasiin Xaaji Samatar oo ay wehliyaan Guddoomiye Ku-xigeenka labaad ee Golaha Shacabka, Mudane Cabdullaahi Cumar Abshirow, Guddiga Doorashada Guddoomiyaha Golaha Shacabka iyo Xoghayaha Guud ee Golaha Shacabka Cabdiraxmaan Maxamed Cabdulle (Jaabiri) ayaa maanta kormeer ku tagtay goobta loo diyaariyey in maalinta berri ah lagu qabto doorashada Guddoomiyaha Golaha Shacabka.
Kormeerkan ayaa ujeedkiisu ahayd hubinta diyaar-garowga goobta, habraacyada doorashada iyo agabka loogu talagalay in lagu howlgalo maalinta doorashada, si loo xaqiijiyo in dhammaan howlaha doorashadu ay u dhacaan si habsami leh, hufan oo waafaqsan habraacyada iyo xeerarka u degsan Golaha Shacabka.
Masuuliyiinta ayaa inta uu kormeerku socday soo indha-indheeyey qeybaha kala duwan ee goobta, iyagoo qiimeeyey diyaargarowga farsamo iyo hab-maamuus ee la xiriira qabsoomidda doorashada, gaar ahaan nidaamka cod-bixinta, goobaha ay ku howlgeli doonaan guddiga doorashada iyo agabka loo diyaariyey xildhibaanada.
Guddoomiyaha KMG ah ee Golaha Shacabka Marwo Sacdiya Yaasiin Xaaji Samatar ayaa adkaysay muhiimadda ay leedahay in doorashadu u dhacdo si hufan, caddaalad ah, sidoo kalena xasillooni leh, islamarkaana waafaqsan xeerarka iyo habraacyada Golaha, waxaana kormeerkan uu qeyb ka yahay dadaallada lagu xaqiijinayo in doorashadu ku qabsoonto jawi ammaan ah, nidaamsan oo hufan, isla markaana loo diyaariyey dhammaan agabka iyo habraacyada lagama maarmaanka u ah qabsoomidda doorashada.
