Guddoomiyaha Gobolka Benaadir ahna duqa Muqdisho ayaa caawa dad weyne aad u fara babadan kula hadlay goob fagaaro ah oo ay isugu soo baxeen, kuwaasi oo qeyb ka ahaa dadkii isugu soo baxay tan iyo saaka dibad bax ka dhan ah maleeshiyaadka Al-Shabaab.
Kumanaan dad ah ayaa ka qeyb galay isu soo baxa caawa ka socday magaalada Muqdisho, taasi oo qeyb ka ah dibad baxyadii maanta ka dhacayay Muqdisho, waxana dadweynaha ay ku dhawaaqayeen hal ku dhigyo looga soo horjeedo argagixisada Al-Shabaab.
Hal ku dhigyada waxaa ka mid ah “Al-shabaab dooni meyno, arxan laawe Umul dooxe doonimeyno iyo kuwa kale oo badan”
Guddoomiyaha Gobolka Benaadir ahna duqa Muqdisho Mudane Thaabit Cabdi Maxamed ayaa caawa dadkii isugu soo baxay dibad baxa u sheegay inay xoojiyaan midnimada ay maanta muujiyeen, isla markaana ay gacan ku siiyaan laamaha amniga sidii guud ahaan dalka looga ciribtiri lahaa Argagixisada Al-Shabaab.
“Maadaama aan joogno meel u dhaw booskii ay argagixisadu ku gumaadeen shacabkeena, waxaan idinka rabaa inaan si taxadar leh u tegno goobtii uu ka dhacay qaraxa, iyadoo aan jirin in la is buurto” ayuu yiri Guddoomiyaha Gobolka.
Guddoomiye Thaabit iyo kumaan dadkii ka qeyb qaadanayay banaan baxa oo ka yimid dhanka garoonka Kubadda Cagta ee Benaadir Stadium ayaa lug ku tegay isgoyska Zoobe km5 ee magaalada Muqdisho oo ah halkii ay ka dhacday musiibadii 14-kii bishan ay argagixisadu ka fuliyeen Muqdisho.
“Maato laaawe, Dooni meyno, Arxan laawey dooni meyno, argagixisad dooni meyno” ayay ku dhawaaqayeen dadweynihii dibad baxyada ka qeyb qaadanayay.
Dadka oo ay madaxa ugu xirnaayeen marooyin gaduudan ayaa watay boorar ay ku qornaayeen hal ku dhigyo ka dhan ah argagixisada Al-Shabaab.
