Wafdi ballaaran oo ay hoggaaminayeen Guddoomiyeyaasha Baarlamaanada Soomaaliya iyo Jabuuti Mudane Maxamed Sheekh Cusmaan Jawaari iyo Mudane Maxamed Cali Xaamud ayaa maanta gaaray magaalada Beledweyne ee xarunta Gobolka Hiiraan, halkaasoo si weyn loogu soo dhoweeyay.
Labada Guddoomiye ayaa waxaa garoonka diyaaradaha Ugaas Khaliif ee magaalada Beledweyne ku soo dhoweeyay Madaxweynaha Dowlad Goboleedka Hirshabeelle Mudane Maxamed Cabdi Waare, Maamulka Gobolka Hiiraan iyo Saraakiil ka tirsan AMISOM.
Wafdiga ayaa loo galbiyay Saldhiga Ceel-Jaalle halkaasi oo ay fariisin ku leeyihiin ciidamada Nabad Ilaalinta Midowga Afrika ee AMISOM, gaar ahaan ciidamada Hiil Walaal ee Jabuuti, halkaasi oo ay shahaadooyin ku guddoonsiiyeen qaar ka mid ah askarta oo ku muteysatay howlkarnimo.
Intaas kaddib Mas’uuliyiinta ayaa loo gudbiyay magaalada Beladweyne ee xarunta Gobolka Hiiraan halkaasi oo lagu qabtay munaasabad soo dhaweyn ah oo ay ka qeyb galeen qeybaha bulshada ee Gobolka ku nool.
Booqashada wafdiga labada Guddoomiye ayaa ah mid ay ugu kuur galayeen xaalada Gobolka oo ay ku sugan yihiin Ciidamo ka socda dalka Jabuuti oo qeyb ka ah howlgalka Nabad Ilaalinta Midowga Afrika ee AMISOM.
