Ku simaha guddoomiyaha golaha Shacabka ahna guddoomiye ku xigeenka 1-aad C/weli Ibraahim Sheekh Muudeey iyo guddoomiye ku xigeenka labaad Mahad Cabdalla Cawad ayaa la kulmay xubno ka tirsan guddiga diyaarinta xeerarka sharciga doorashooyinka qaranka.
Guddigan oo dhowaan uu magacaabay guddoonka labada Aqal ee baarlamaanka ayaa ka kooban 17 xubnood, waxaana kulanka uu ahaa mid is xog-wareysi ah oo looga hadlayay arrimaha doorashooyinka.
Guddigan ayaa howsha laga sugayay ay tahay sidii ay uga shaqeyn lahaayeen goobaha la geynayo kuraasta Xildhibaannada la soo dooranayo, qoondada haweenka, kuraasta Xildhibaannada ka soo galaya Somaliland iyo arrinta Gobolka Banaadir sidii ay xuquuq uga heli lahaayeen Aqalka Sare.
Guddoomiyaha guddiga madaxa bannaan ee doorashooyinka Qaran Xaliimo Ismaaciil Ibbraahim (Xaliimo yareey) ayaa ugu baaqday Xildhibaannada labada Aqal in looga baahan yahay inay dedejiyaan sharciga axsaabta, si xisbiyada la diiwaan geliyay ay uga baxaan kumeel gaarnimada.
