Xiiso iyo xamaasad gaar ah ayuu kusoo idlaadey horyeelka heerka 1-aad ee Caasimada Galmudug oo ay sanadkan ku tartameen 11-kooxood, oo ugu dambeyn kulanka dhamaadka tartanka ay isla soo gaareen kooxaha kukala ciyaarayay Magaca Shirkada Singjet iyo Kooxda kale ee ku ciyaarta Magaca Caasimada Galmudug ee Dhuusamareeb.
Kulanka xiritaanka oo ay ka qayb galeen Mas’uuliyiinta sare ee Galmudug sida Gudoomiyaha Baarlamaanka ayaa koobka lagu gudoonsiiyey Kooxda Caasimada oo 3 gool kaga adkaatey dhigeeda Singjet.
Maxamuud Cnuur Xassan madaxii hore ciyaaraha Maamulka Dhuusamareeb iyo Maxamed Nuur Maxamed gudoomiyaha ururka sportska Dhuusamareeb ayaa kooxaha tartankan ka qayb galey kaga mahad celiyay kaalintooda .
Gudoomiyaha Dhuusamareeb ahna duqa caasimada Macalin Cabdiraxmaan Geedaqoroow ayaa maamulkii hore ee dhalinyarada ciyaaraha ku amaaney sida ay u abaabuleen Dhalinyarada jecel Kubbada Cagta.
Mahad Cabdi Gabeyre Xog-hayaha xiriirka kubbada cagta Galmudug ayaa xusey in kulamada nuucaan ah ay qayb ka yihiin dadaalada Galmudug ku dooneyso in lagu hor istaago colaada.
Ugu dambeyn Gudoomiyaha Baarlamaanka Galmudug Dr Maxamed Nuur Gacal ayaa hambalyo u ujeediyay kooxaha tartankan ka qayb galey gaar ahaan labada naadi ee isla soo gaarey kulankii ugu dambeeyay.
