Guddoomiyaha gobolka Banaadir ahna Duqa Magaaladda Muqdisho Mudane Xasan Maxamed Xuseen”Muungaab” oo safar shaqo ku jooga Turkiga ayaa kulan la qaatay Ra’isul Wasaare ku xigeenka dalka Turkiya Prof.Dr. Numan Kurtulmus oo Ka wada hadleen arimo dhowr ah oo ay ugu horeyso sidii loo horumarin lahaa Caasimadda Soomaaliya ee Muqdisho.
Mudane Muungaab ayaa R/wasaare ku xigeenka uga mahadceliyay taageerada dhinacyada badan ee dawladda Turkiga siiso Soomaaliya gaar ahaan mashaariicda horumarineed ee Turkiga uu ka wado magaalada Muqdisho,wuxuuna warbixin buuxda ka siiyay xaaladda guud ee dalka marayo gaar ahaan Caasimadda Soomaaliya ee Muqdisho isaga oo ka codsaday in Turkiga ay sii kordhiso Mashaariicda horumarineed oo ay kawadaan Caasimadda Soomaaliya,si gaar ah waxaa diiradda la saaray sidii loo fuli lahaa Mashruucii 10 KM ee dib loogu dhisi lahaa waddada wadnaha mashruucaas oo laga sugayay hay’adda TIKA oo horay ugu balan qaatay Guddoomiyaha gobolka Banaadir mar uu safar ku tagay Ankara bishii Juun ee isla sanadkaan 2014 .
R/wasaare ku xigeenka ayaan dhankiisa aad u soo dhaweeyay horumarka ay ku tilaabsanayso Muqdisho wuxuuna balanqaaday in Turkigu sii labalaabayo taageerada ay siiyaan Soomaaliya mar kastana ay garabtaagan yihiin Soomaaliya una ducaynayaan , si gaar ayuu carabka ugu adkeeyay in 10 kii KM ee dhismaha wadadda wadnaha la bilaabi doono isaga oo sheegay in uu arintaas kala hadli doono Hay’adda TIKA , waxaa xusid mudan in R/wasaare ku xigeenkaan uu yahay u qaabilsanaha Xukuumadda Turikiga dhinacyada hay’adaha oo ay kamid tahay TIKA.
