Gudoomiyaha Golaha Shacabka Jamhuuriyadda Federaalka Soomaaliya Mudane Maxamed Sheekh Cusmaan Jawaari iyo Gudoomiye Ku Xigeenka Labaad ee Baarlamaanka Mudane Mahad Cabdalla Cawad oo maalmahan ku sugnaa dalka Jarmalka oo ay kulammo kula lahaayeen madax iyo khuburro ayaa maanta booqasho taariikhi ah ku tagay xarunta Baarlamaanka Dalka Jarmalka halkaasi oo ay kulammo kula qaateen Guddoonka dhigooda ah ee Baarlamaanka Jarmalka.
Calanka quruxda badan ee Jamhuuriyadda Federaalka Soomaaliya ayaa ka dul babanayey dhismaha dalka Jarmalka ayadoo Guddoonka labada Baarlamaan ee Soomaaliya iyo Jarmalka ay wada qaateen kulammo saacaddo qaatay oo looga hadlayey xiriirka iyo iskaashi adag oo dhex mara labada Baarlamaan ee Soomaaliya iyo Jarmalka ayadoo Guddoonka Baarlamaannada labada dalna ay isku wada afgarteen wadashaqeynta iyo iskaashigaasi.
Dhinaca kale Guddoonka Baarlamaanka Federaalka Soomaaliya ayaa si gaar ah ula kulmay madaxa guddi qaabilsan arrimaha bariga Afrika oo ka kooban 36 Xildhibaan islamarkaana ka tirsan Baarlamaanka dalka Jarmalka waxaana uu Gudoomiyaha Golaha Shacabka Jamhuuriyadda Federaalka Soomaaliya Mudane Maxamed Sheekh Cusmaan Jawaari uu ballan qaaday dhismaha guddi Baarlamaani Soomaali ah oo guddigan Jarmalka ah kala shaqeyn doona arrimaha xiriirka iyo wada shaqeynta labada Baarlamaan.
Wafdiga uu hogaaminayo Gudoomiyaha Baarlamaanka Federaalka Soomaaliya Mudane Maxamed Sheekh Cusmaan Jawaari ayaa dhinaca kale la kulmay madaxa xafiiska arrimaha dibadda ee Afrika ayaga oo ka wada hadlay sidii sare loogu qaadi lahaa taageerrada iyo iskaashiga labada dal ee Soomaaliya iyo Jarmalka oo iyagu horey u lahaan jiray xiriir taariikhi ah oo baaxad weyn.
—-DHAMMAAD—
Xafiiska Warfaafinta iyo Xiriirka Dadweynaha Ee Guddoonka Baarlamaanka
Media and Public Relation Office Of Speaker
Email:- [email protected]
