Gudoomiye ku xigeenka Labaad ee Golaha Baarlamaanka Jamhuuriyadda Federaalka Soomaaliya Mudane Mahad Cabdalla Cawad iyo wafdi Xildhibaanno ah oo uu hogaaminayey oo dib ugu soo laabtay dalka ayaa si heer sare ah loogu soo dhaweeyey magaalada Muqdisho.
Wafdiga uu hogaaminayey Gudoomiye ku xigeenka Labaad ee Baarlamaanka Mudane Mahad Cabdalla Cawad waxaa garoonka diyaaradaha Aadan Cade ee magaalada Muqdisho kusoo dhaweeyey Xildhibaanno tira badan oo ka tirsan Baarlamaanka,saraakiil,siyaasiyiin iyo fanaaniinta kooxda barbaarta gaashaaman oo iyagu ku soo dhaweeyey wafdiga ciyaarro hidaha iyo dhaqanka ah.
Mudane Mahad Cabdalla Cawad Gudoomiye ku xigeenka Labaad ee Baarlamaanka Federaalka Soomaaliya oo qeybta nasashada garoonka diyaaradaha saxaafadda kula hadlay ayaa faah faahin ka bixiyey safarka ay isaga iyo wafdigiisa ku tageen dalka aynu dariska nahay ee Ethiopia halkaasi oo ay kaga qeybgaleen munaasabadda qowmiyadaha dalka Ethiopia,kadibna waxa uu kulammo gaar gaar ah la qaatay hogaanka Baarlamaanka Ethiopia iyo mas’uuliyiin ka tirsan Midowga Afrika oo ay ka wada hadleen dhaqan gelinta heshiisyada Midowga Afrika ee uu qaarkood Baarlamaanku ansixiyey.
Ugu dambeyntii Gudoomiye ku xigeenka Labaad ee Baarlamaanka Federaalka Soomaaliya Mudane Mahad Cabdalla Cawad waxa uu aad u ammaanay dadaalka iyo kaalinta muuqata ee uu Safiirka Dowladda Soomaaliya u fadhiya dalka Ethiopia danjire Axmed C/salaan Xaaji Aadan ka geystay xiriirka iyo xoojinta wada shaqeynta Baarlamaannada Soomaaliya iyo Ethiopia iyo sidoo kale guud ahaanba iskaashiga labada Dowladood.
Warbixinta Soo Dhaweynta oo Muuqaal ah Hoos Ka Daawo:-
