بسم الله الرحمن الرحيم
الحمد لله، والصلاة والسلام على رسول الله، وعلى آله وأصحابه ومن والاه.
Hay’adda Culumada Soomaaliyeed waxay si dhow isha ugu haysay arimaha Yaman ka taagnaa in muddo ah waxayna ka soo saaraysaa bayaanka hoos ku xusan:
1- Dhibka ka jira Yaman waxaa masuul ka ah kooxda xuuthiyiinta oo ka tallaabsaday wixii la isku ogaa una hanqal taagaya inay boobaan maamulka, dadka iyo dalkana u gacan galiyaan qorshaha is-ballaarinta shiicada.
2- Hay’addu waxay cambaaraynaysaa fitnada iyo iska-horkeenka ay Shiicadu ka hurinayso dunida islaamka, siiba :Lubnaan , ciraaq , Suuriya iyo Yaman , waxayna ugu baaqaysaa in ay ilaahay ka baqaan ummadda muslimka ahna dhibka ka daayaan.
3- Hay’addu waxay soo dhawaynaysaa fikradda is-bahaysiga oo uu hogaaminayo boqorka sacuudiga ,waxayna rajaynaysaa in uu gun dhig u noqdo is-kaashi dhab ah oo difaaca diinta , danaha iyo sharafta ummadda muslimka ah.
4- Hay’addu ,ayadoo ka duulaysa khibradda ay u leedahay dhibka ka dhasha dagaalka , waxay ugu baaqaysaa xuuthiyiinta iyo xulafadooda in ay u dhaga nuglaadaan baaqyada nabadda , dalkana aysan ku shalwin buhosha burburka oo aan caymada lahayn .
Ilaahay ha ka badbaadiyo muslimiinta dhammaan wixii dhib ah.
Wa billaahi towfiiq
Hay’adda Culumada Soomaaliyeed
Golaha Fulinta
Muqdisho- Soomaaliya
