Kulankan oo ay hy’adda culimada Soomaaliyeed ay ku yeesheen Muqdisho ayaa waxa ay uga hadleen abaaraha ku dhuftay gobollada dalka Soomaaliya iyo saameynta ay ku yeesheen nolosha dadka iyo duunyada, iyagoo ugu baaqay bulshada Soomaaliyeed, Dowladda Federaalka Soomaaliya iyo hay’adaha samafalka in ay ka qeyb qaataan gurmadka loo sameynaya abaaraha ka jira dalka Soomaaliya.
kulanka ayaa waxaa ka soo qeyb galay culimada Soomaaliyeed, aqoonyahanno iyo marti sharaf kale ee lagu casuumay kulankaasi, waxaana intii uu socday kulanka diiradda lagu saaray sida ugu haboon ee looga qeyb qaadan karo gurmadla loo sameynaya dadka iyo duunyada ku nool gobollada ay ku dhufatay abaaraha.
Guddoomiye ku xigeenka hay’adda culimada Soomaaliyeed Sheekh Nuur Baaruud Gurxan oo isna ka hadlay ayaa ku booriyay Umadaha muslimiinta iyo hay’adaha gargaarka inay soo caawiyaan dadka walaalahooda ah ee ay saameysay abaarta ka jirta gobollada dalka
Gudoomiyaha hay’adda culimada Soomaaliyeed Sheekh Bashiir Axmed Salaad oo ka hadlay kulanka ayaa ugu baaqay bulshada Soomaaliyeed, ganacsatada iyo dowladda Soomaaliya inay ka qeyb qaatan gurmadka loo sameynayo dadka iyo duunyada ay saameeyeen abaaraha ka jira dalka.
“Deegaanada Ummadda Soomaaliyeed waxaa ka jira abaaro baahsan haba u darnaato Somaliland, waxeyna ku soo aadeen abaarahaasi waqti ay jirto xaalad siyaasadeed iyo xaalad amni oo aan deganeyn, sidaa darteed hay’adda culimada Soomaaliyeed waxey soo jeedineysaa baaqan soo socda in ilaahey loo towbad keeno, Subxanahu Watacaalaa Leysuna celsho xuquuqda aadanuhu kala haystaan, istiqfaartuna la badiyo, waayo musiibooyinka waxaa keena dunuubta iyo macaasida, mida labaad waxaan ugu baaqeynaa dowladda dhexe iyo dhamaan maamul goboleedyada dalka in ay laba jibaaraan wax ka qabashada abaaraha iyo taakuleynta daka baahan” ayuu yiri Sheekh Bashiir Axmed Salaad.
2011kii ayey aheyd markii abaaro nuucaani oo kale ay ku dhufatay qaar ka mid ah gobolada dalka, taasoo waxyeleysay dadka iyo duunyada.
