Hay’adda Qaramada Midoobay u qaabilsan Cunada iyo beeraha ee marka magaceeda la soo gaabiyo loo yaqaan FAO ayaa ka digeysa Ayax lixaad leh oo ku wajahan qeybo ka mid ah Gobolada Koonfurta Soomaaliya ee Beeraha hodanka ku ah.
Ayaxan ayaa waxaa la sheegay in dabeyluhu saacidayaan, isla markaana ay qeyb ka yihiin duulaanka uu ugu jiheystay Koonfurta Soomaaliya.
Deegaanada Galmudug iyo Puntland oo ah meelaha ugu daran ee Soomaaliya Ayaxu saameeyay ayaa waxaa hadda isbiirsanayo oo is aruursanaya korankoradu Ayaxa halkaasi kaga tagay, taasoo Koonfurtu ku sii jeeda.
Hay’adda FAO waxaa ay sheegtay in xilligan oo ah xilli roobaadka Soomaaliya, isla markaana dabeylo xoog leh ay jiraan uu Ayaxa qeyb weyn ay ka qaadanayo, ayna adagtahay in Ayaxa lala dagaalamo.
Alphonse Owuor oo ah Sargaal ka tirsan Hay’ada FAO ayaa sheegay in la dagaallanka Ayaxa ay tahay caqabad aad u adag oo hada Soomaaliya ka jirta, waxaa uu sheegay in Wasaaradda Beeraha Soomaaliya iyo sidoo kale Maamul Goboleedyada Puntland iyo Galmudug oo kaa shanaya Hay’adda FAO ay wadaan dadaal xoog leh oo lagu xakameynayo Ayaxa Soomaaliya.
Ayaxan ayaa FAO ka digeysaa haddii uu gaaro Koonfurta Soomaaliya in uu waxyeelo u gaysan doono beeraha Soomaaliya, isla markaana adkaan doonto in Ayaxaasi la wiiqo ama laga adkaado.
Soomaaliya ayaa iminka la qayaasayaa in ilaa shan malyan oo qof ay u baahanyihiin cunto ay cunaan.
