Hay’adda Nabad sugidda iyo Sirdoonka Qaranka ayaa soo bandhigay taarko ku xirneyd gaari maanta ku qarxay agagaarka Siinka dheer, halkaasi oo ay ku dhinteen labo qof oo uu mid ka mid ah ahaa askarigii baarayay gaariga qaraxa waday iyo naftii halige ka tirsanaa Al-Shabaab.
Saraakiisha ciidanka Nabad sugidda iyo Sirdoonka Qaranka ayaa sheegay in taargada ay soo bandhigeen ay tahay tii ay ku xirneyd gaariga ku qarxay Siinka dheer ee ay baaritaanka ku sameynayeen ciidamada Nabad sugidda.
Gaari Qaraxa laga soo buuxiyay ayey ku qabteen Ciidanka NISA agagaarka Siiinka dheer, wuxuuna qarxay gaariga intii uu baaritaanku socday, iyadoo uu ku dhintay hal Askari oo ka tirsan NISA, uuna ku dhaawacmay askari kale iyo ismiidaamiyihii gaariga qaraxa laga soo buuxiyay watay.
Ciidamada amniga ayaa habeen iyo maalin waxa ay u taaganyihiin inay ka hortagaan dhagarta ay maleegayaan argagixisada Al-Shabaab, waxaana damaca dhagar qabaha isku qarxiyay gaariga uu ahaa in uu gumaado dad rayid ah, balse ciidanka NISA ayaa ka warhelay xogta ah in gaariga uu qarax ka buuxo.
