Guddoomiyaha gobolka Banaadir ahna duqa magaalada Muqdisho mudane Cumar Maxamud Maxamed (Cumar Filish) ayaa xariga ka jaray xarunta labaad ee hey’ada socdaalka iyo Jinsiyadda Soomaaliya oo laga hirgaliyay degmada Cabdicasiis.
Xaruntan cusub ee la daahfuray ayaa ah mid loogu adeegi doono bulshada caasimadda ku dhaqan gaar ahaan 8-Degmo oo katirsan gobolka Banaadir, kuwaas oo kala ah Cabdicasiis, Kaaraan, Yaaqshiid, Shibis, Boondheere, Heliwaa, Shangaani iyo Xamar Weyne.
Agaasimaha Hay’adda Socdaalka iyo Jinsiyadda Maxamed Aadan Jimcaale Koofi ayaa sheegya in xarunta cusub loogu adeegi doono bulshada Soomaaliyeed.
“Maadaama caasimaddu ay shacabkeedu aad u badanyahay, lana arkay cariiriga hadda ka jirta xarunta weyn, ayaa la isla gartay in la helo xarun kale, xarunta waxaa xafiisyada ku deeqday Wasaaradda Kalluumeysiga, halka Wasaaradda Maaliyadda iyo Hay’adda ay iska kaashadeen dhismaha iyo qalabeynta xafiisyada, xarunta waxa loogu adeegi doonaa 8 degmo oo Gobolka Banaadir ka tirsan, kuwaasi oo kala ah C/casiis, Shangaani, Kaaraan, Shibis, Xamar Weyne, Yaaqshiid, Heliwaa iyo Boondheere”ayuu yiri Agaasimaha guud ee hay’adda Socdaalka iyo Jinsiyadda Soomaaliya.
Guddoomiyaha Gobolka Banaadir mudane Cumar Maxamud Maxamed (Cumar Filish) ayaa sheegay inay soo dhaweynayaan hirgelinta xarunta hay’adda socdaalka qeybteeda bariga Muqdisho.
“Si gaar ah ayaan ugu mahadcelineynaa Madaxda Laanta Socdaalka ee manta ka rumeysay balan qaadyadii aan siinay bulshada oo ah adeegyada dowladda oo loo soo dhaweynayo, ciriirga, waddooyinka xiran iyo saxmadda ka jirta caasimadda si ay uga nastaan, runtii 8da degmo bulshada ku dhaqan muhiimad ayay u leedahay”. Ayuu yiri Guddoomiyaha Gobolka Banaadir.
Taliyaha ciidanka booliska Soomaaliya Sareeyo Gaas Cabdi Xasan Maxamed ayaa sheegay in xarunta ay muhiimad gaar ah u leedahay bulshada ku nool gobolka, isla markaana boolisku ay xarunta dambi barista ka furi doonaan bariga Muqdisho.
“Waxaan rabnaa inaan xarunta CID qeyb ka mid ah keeno bariga magaalada Muqdisho, si bulshada ay u helaan adeegyada xarunta”ayuu yiri Taliyaha Booliska.
Wasiir ku-xigeenka Wasaaraddda Maaliyadda ee Xukuumadda Soomaaliya Mudane Cabdullaahi Sheekh Cali Qaloocow ayaa sheegay in hay’adda socdaalka iyo jinsiyadda ay qabatay howl aad u fiican
“Waxa ay qabatay waxyaabo ugu fara badan, runtii baasaboorka qiimo sare ayuu caalamka ku leeyahay, waana rajeyayaa in xaruntan cusub ay bulshada wax badan u qaban doonto” ayuu yiri Wasiir Qaloocow.
