Hay’adda Maareynta Musiiboyinka Qaranka ee SoDMA, ayaa Maanta Qoysas danyar ah oo dhawaan saameeyeen daadad xoog leh oo Magaalada Xudur ku soo rogmaday waxa ay gaarsiisay deeq Mucaawino ah.
Shixnadaan Gargaar waxaa ka Faaiideystay 215 Qoys oo iskugu jira Danyar iyo kuwa Qaba baahiyaha Gaarka ah, Raashinika la gaarsiyey dadkaan, ayaa isugu jira Bur, Bariis, Baasto, Sonkor iyo dhammaan qeybaha kala duwan ee Raashinka.
Dhamnaan dadkii Gargaarkaan loo qeybiyey iyo Maamulka Degmada Xudur ee Maamulka Koonfur Galbeed Soomaaliya, ayaa u mahadceliyey Hay’adda Maareynta Musiiboyinka Qaranka si gaar ah Guddoomiye Maxamuud Macalim Cabdulle waxaana ay shegeen in uu u soo gurmaday xilli Reer Xudur wajahayeen xaalad adag kadib Roobab Mahigaan ah oo halkaas ka da’ayeen oo ay ka dhasheen daadad ay xafadaha qaar buux dhaafiyeen, taas oo sababtay in dadkii daganaa ay barakacaan.
Boqolaal dad ah ayaana ku barakacay biyahaas xoogan ee xafadaha qaar ku rogmaday, waxaana ay baabiiyeen Beero sanadkaan la filayey in ay soo saraan dalagyo kala duwan.
