Hay’adda Maareynta Musiibooyinka ayaa marti-galisay dood cilmiyeed ay soo qaban-qaabisay Xarunta Cilmi-baarista iyo Tababarrada Hay’adda SoDMA oo u jeedkeedu yahay sidii dib loogu dhisi lahaa buundooyinka gobolka Gedo ee ku burburay fatahaaddii El-nino isla-markaana loo xoojin lahaa dadaallada u qareemidda iyo qaaraan-aruurunta ee socda.
Madasha waxaa si weyn loogu lafa-guray saameynta taban ee ka dhalatay roobabkii xoogganaa ee dalka ka da’ay dhammaadki sanadkii hore gaar ahaan qiimeynta buundooyinka gobolka Gedo ee burburay, sidii loo taageeri lahaa isku-dayga dadka degaanka ee ku aaddan dib u dhiska buundooyinka iyo garab istaagga howlaha Guddiga Dib-u-dhiska Buundooyinka.
Guddoomiyaha Hay’adda Maareynta Musiibooyinka, Mudane Maxamuud Macallin Cabdulle oo kulanka daah-furay ayaa aad ugu dheeraaday muhiimadda ay buundooyinku u leeyihiin guud ahaan nolosha bulshada.
Guddoomiye Ku-xigeenka Hay’adda Dr. Axmed Cabdi Aadan oo kulanka soo xiray ayaa xusay in SoDMA ay mar waliba diyaar la tahay kaalinteeda, isagoo si weyn u boorriyay is-kaashiga iyo isku-tashiga bulshada Gedo.
Wasiiru-dowlaha Wasaaradda Tamarta iyo Kheyraadka Biyaha XFS Maxamed Cabdullaahi, Wasiiru-dowlaha Wasaaradda Beeraha iyo Waraabka JFS, Xildhibaan Asad Cabdirisaaq, Guddoomiyaha Ururrada Bulshada Rayidka Mudane Cusmaan Macalin Shaatax, Guddoomiyaha Guddiga Dib-u-Dhiska Buundooyinka Gedo, Prof Ibraahin Faarax Bursaliid, madax kale iyo khubaro aqoon durugsan u leh muwduuca ayaa ka qeyb-galay dood-cilmiyeedkaan.
