Hey’adda qaxootiga Qaramada Midoobay ee UNHCR ayaa sheegtay qiyaastii 5,000 oo qaxooti Soomaali ah oo ku sugnaa xeryaha dhadhaab ee waddanka Kenya ayaa dib ugu soo laabtay waddanka tan iyo bishii December sannadkii horre ee 2014.
Hey’addu waxaa kaloo sheegtay in 4,500 ay is diiwaangaliyeen iyagoona raba in ay dib ugu soo laabtaan waddanka.
UNHCR ayaa ku caaawisay dadka soo laabanaya sahay iyo gargaar kale waxaana badi ay soo gaareen magaalooyinka Muqdisho, Kismaayo, Baydhabo iyo Luuq.
Afhayeen u hadlay UNHCR oo lagu magacaabo Adrian Edwards ayaa wariyaasha ugu sheegay magaalada Geneva qaxootiga Soomaalida ee ku sugan xeryaha dhadhaab in ay u baahan yihiin taakuleen maadama ay dib ugu soo laabanayaan waddanka.
Sidoo kale UNHCR ayaa sheegtay in ka badan 26,000 oo qaxooti Soomaali ah ay ka soo carareen colaadaha waddanka Yemen, waxaana ay dib ugu soo laabteen Soomaaliya gaar ahaan Muqdisho.
