Hay’adda qaxootiga Qaramada Midoobey ee UNHCR ayaa ku dhawaaqday in tan iyo markii uu billowday qorshaha dib u celinta qaxootiga Soomaalida ee ku jira xeryaha Dhadhaab, waqooyi bari Kenya ay ku laabteen Soomaaliya qaxooti gaaraya 6000 oo Soomaali ah.
Qoraal ay soo saartay UNHCR ayey ku sheegtay in 248 qaxooti ah bishii December ee sannadki tagay laga caawiyey in ay u safraan magaalooyinka Muqdisho iyo Baydhabo, tiradaasoo ka dhigeyso 6,101 Soomaali ah in ay dalkooda ku laabteen tan iyo bishii December 2014, markaasoo barnaamijka dib u celinta uu billowday.
3,900 oo qaxootigaas kamid ah ayaa safar dhulka ah ku gaaray Soomaaliya, halka 2,201 diyaarado lagu geeyey Muqdisho iyo magaalooyin kale oo koonfurta ku yaalla, sida hay’addu sheegtay.
Qorshaha dib u celinta ayaa qeyb ka ah heshiis ay si iskood ah qaxooti ugu noqonayaan dalkooda oo ay 2013 gaareen dowladaha Soomaaliya, Kenya iyo UNHCR.
