Hoggaamiyeyaasha dalka Suudaan ayaa sheegay in Golaha Militariga Kumeel gaarka ah ee dalka xukumayay tan iyo markii xilka laga tuuray madaxweynihii hore ee dalkaas Cumar Al-Bashiir ay ka go’an tahay in talada dalka ay ku wareejiyaan Xukuumad Shacbi ah.
Balse, Hoggaamiyeyaasha Mucaaradka ayaa axaddii shalay sheegay iney laaleen wada hadaladii ay la lahaayeen Madaxda Xukuumadda Militariga Suudaan,sababtuna waxay ku sheegeen ineysan rumeysneyn balanqaadkoodii ahaa iney xukunka dalka wareejinayaan.
“Golaha Militariga Kumeel gaarka ah ayaa si buuxda u taageeraya kacdoonka iyo kacaanka, Goluhu waxaa ka go’an in uu awooda ku wareejiyo Shacabka, “ayuu yiri Generaal Abdel Fattah Al-Burhan.
Hoggaamiyayaasha mucaaradka Suudaan ayaa markii dambe dibad-bax balaaran oo ka dhacay caasimadda Khartuum taageerayaashooda ugu sheegay iney Militariga ku fashilmeen iney ka jawaabaan dalabkoodii ahaa in awooda dalka loo gacan geliyo shacabka,islamarkaana rabitaankooda ku dalban doonaan dibad-baxyo dheeraad ah.
“Golaha millatariga wali dhab kama ahan iney awooda ku wareejiyaan Shacabka, sidoo kale Golahan Militari wuxuu metalayaa nidaamkii hore,” ayuu yiri afhayeenka u hadlay Ururka Xirfadlayaasha Sudan (SPA).
