Fartuun Cabdi Cali oo ah Hooyo Soomaaliyeed oo ku nool Gobolka Minnesota ayaa ka qalin badalatay Jaamacadda (Saint Mary’s University of Minnesota) oo ka mid ah Jaamacadaha ugu waa weyn Gobolka Minnesota ee dalka Maraykanka.
Hooyo Fartuun ayaa waxay Jaamacadda heerka Koowaad ee Tacliinta Sare ku qaadatay horumarinta Ganacsiga iyo Suuq gaynta, iyadoo sheegtay in heerka labaad (Master degree) ee Jaamacadda ay dhawaan bilaabi-doonto.
Marwo Fartuun oo haysato 4 carruur ah ayaa waxay fariin u dirtay Hooyooyinka aaminsan haddii ay ilmo korinayaa in aysan wax baran karin, oo ay fadhiga ka kacaan, ayna ku dadaalaan sidii ay wax ula qeybsan lahaayeen asaagooda.
Qaar ka mid ah Jaaliyadda Soomaaliyeed ee ku dhaqan dalka Maraykanka ayaa ugu hambalyeeyay Fartuun Cabdi Cali guusha ay ka gaartey heerka koowaad ee Waxbarashada Jaamacadda, iyagoo ku dhiirigeliyey inay dadaalka ay halkaas ka sii wado.
