Diyaaradaha aan cidna wadin ee Drones-ka loo yaqaan ayaa lagu soo waramayaa inay duqeyn u geysteen xarumo ay ku dhuumaaleysanayeen kooxda Shabaab, halkaasi oo ka dhashay qasaare isugu jirta dhimasho iyo dhaawac.
Duqeynta ayaa waxaa ay ka dhacday hooy ku yaalla degmada Diinsoor ee gobolka Baay, halkaasi oo ay ku dhinteen tiro ka tirsan horjoogayaasha kooxda Shabaab, isla markaana ay dad deegaanka u diideen in ay wax ka ogaadaan qasaaraha dhabta ah ee kooxdaasi ka soo gaartay duqeynta loo geystay.
Related posts
Wariyaha Warbaahinta Qaranka ee Gobolka Baay Siraaji Sheekh Isxaaq ayaa ku soo waramay in duqeynta ay ku dhinteen horjoogayaal ka tirsan kooxda Shabaab, isagoo intaa ku daray in dadka deegaanka ay ka cabsadeen inay ka warbixiyaan qasaaraha inta uu la egyahay.
Warku waxa uu intaa ku darayaa in duqeynta ka dhacday degmada Diinsoor ay sidoo kale ku dhinteen shan qof oo rayid ah.
Sidoo kale weerar kan la mid ah ayaa lagu soo waramayaa in ay ka dhacday deegaanno ka tirsan gobolka Shabeelaha Hoose, gaar ahaan deegaanka Dugule oo ay ku geeriyoodeen ugi yaraan 45 ka tirsan argagixisada Al-Shabaab.
Goob jooge ku sugan gobolka Shabeelaha Hoose ayaa Radio Muqdisho u sheegay in weerarka xagga cirka ah lala eegtay kolonyo gaadiid ah oo ay wateen horjoogayaal ka tirsan kooxda Shabaab oo isugu jirta ajaanib iyo kuwa Soomaali ah, waxaana sidoo kale la duqeeyay guryo ay kooxdaasi ku dhuumaaleysanayeen.
Qasaaraha ka dhashay duqeymaha ayaa isa soo taraya, waxaana la rumeysanyahay in weerarka xagga cirka ah uu qasaare lixaadleh u geystay kooxda Shabaab.
