Ciidanka Xoogga Dalka ayaa howlgalo ay ka sameeyeen deegaanka Hees oo ka tirsan gobolka Hiiraan waxa ay ku dileen Horjooge sare oo katirsanaa Maleeshiyaadka Al-shabaab, kaasi oo Argagixisada u qaabilsanaa Uruurinta lacagaha baadda ah.
Saraakiil katirsan Ciidanka Xoogga Dalka ayaa u xaqiijiyey Warbaahinta Qaranka in Horjoogahaan lagu magacaabo Cali Axmed Guure, islamarkaana deegaanka uu ka dhacay Howlgalka lagu dilay uu u dhaxeeyo magaalooyinka Baladweyne iyo Maxaas ee gobolka Hiiraan.
Sida ay soo sheegayaan wariyeyaasheena gobolka Hiiraan dadka deegaanka ayaa soo dhaweeyey dilka Horjooge Cali Axmed Guure oo sida ay sheegeen ka qaadi jiray lacago baadd ah, taasi oo dhibaato ku aheyd dadka gobolka.
Ciidamada ayaa la wareegay deegaanka Hees oo qiyaastii 35-km u jira a magaalada Baladweyne ee xarunta gobolka Hiiraan, taasi ayaana meesha ka saareysa dhibaatadii Al-shabaab ay ku hayeen shacabka deegaanka Hees.
Hawlgalkan lagu dilay Horjooge Cali Axmed Guure ayaa waxaa iska kaashanayey ciidamada xoogga iyo AMISOM, waxaana sidoo kale lagula wareegay deegaanka Baar Dheere iyo wadada Afar Irdood oo isku xira magaalooyinka Baladweyne, Maxaas iyo magaalada Buula Burde.
Ciidanka Xoogga dalka ayaa howlgalo kala duwan ka wada deegaanno iyo degmooyin kamid ah dalka, kuwaas oo lagu dilay Horjoogayaal muhiim u ahaa Argagixisada Al-shabaab.
