Ciidanka xoogga dalka Soomaaliyeed iyo kuwa dowlad goboleedka Galmudug ayaa magaalada Camaara ee gobolka Mudug ku soo bandhigay Horjoogihii Argagixisada Al-Shabaab u qaabilsanaa afduubka Ajaanibta.
Magaca horjoogaha lagu qabtay Camaara waxaa lagu sheegay Jabriil Saciid Cali, waxuuna kooxda u qaabilsanaa Afduubka Ajaanibta arrimaha samafalka u yimaada Soomaaliya.
Jabriil waxaa la sheegay inuu horay u qafaashay weriyeyaashii ka kala socday dalalka Faransiiska iyo Jarmalka, kuwaas oo uu ka qaatay lacago madax-furasho ah.
Ciidamada dowladda ayaa gelinkii dambe ee shalay gudaha u galay Camaara jyo deegaano kale oo ka tirsan koonfurta gobolka Mudug, waxaana saacadihii u dambeeyey howlgalladaas lagu khaarajiyay in ka badan 200 oo dagaalame oo ka tirsanaa Argagixisada Al-Shabaab, kuwaas oo isugu jira maleeshiyaad iyo horjoogayaal, sidoo kale saanad ciidan oo xoog leh ayey ciidamada qaranku ku furteen howlhallada.
Shacabka magaalada Camaara ayaa ku bogaadiyey ciidamada qaranka gulufka dagaal ee ka socda gobolka Mudug, kaas oo lagu soo afjarayo Argagixisada ku dhuumaaleysata deebaano yar oo ka tirsan gobollada Mudug iyo Galgaduud ee Galmudug.
