Ciidamada Qaranka oo taageero ka helay Ciidamada Maraykanka ayaa weerar qorshaysan Ka fuliyay fariisimo Alshabaab ku lahaayeen Gobolka Mudug, sida lagu sheegay war qoraal ah oo ka soo baxay wasaaradda warfaafinta Soomaaliya.
Hawlgalkaan oo dhacay saaka waabarigii ayaa daba socday weerar kale oo shalay ka dhacay deegaanka Maamiye ee degmada Xarar dheere ee gobolka Mudug.
Goobaha la beegsaday ayaa Alshabaab u aheyd saldhig ay ka abaabulayeen weeraro ka dhan ah Shacabka Soomaaliyeed.
Howlgalkaan waxaa ku naf waayay horjoogayaal iyo maleeshiyaad ka tirsan kooxda argagaxisada ah ee Alshabaab mana jirto waxyeelo soo gaartay shacabka ku nool deegaanada howlgalka laga fuliyay.
Tani waxeey muujinaysaa sida Ciidamada Qaranku awood ugu leeyihiin in ay ku beegsadaan Alshabaab goob kasta oo ay ku sugan yihiin iyo sida kooxdu ay ugu nugushahay in talaabo looga qaado goobkasta oo ay ku dhuumaalaysanayaan, sida lagu sheegay qoraalka wasaaradda warfaafinta.
Dawladda Soomaaliya waxaa ka go’an in ay ka hor istaagto argagixisada in ay waxyeeleeyaan bulshada waana taas sababta loo joogtaynayo hawlgalada nuucaan ah.
