Wasaaradda Xanaanada Xoolaha, Dhirta iyo daaqa ee Dowladda Federaalka Soomaaliya oo kaashaneysa Hay’adda cunada iyo beeraha u qaabilsan Qaramada Midoobay ee FAO ayaa soo qaban qaabisay shir looga hadlayay horumarinta qorshaha Qaranka ee Xanaanada xoolaha Soomaaliya ee seddaxda sano ee soo socota oo ay ka qeyb galeen Wasaaradaha xanaanada xoolaha ee Dowlad Goboleedyada iyo sidoo kale qubaro dhinaca xanaanada xoolaha ah.
Shirkan ayaa waxa uu daba socdaa laba shir oo bartamihii sanadkan ka dhacay magaaladda Muqdisho, kuwaasoo Wasaaradda Xanaanada Xoolaha ,Dhirta iyo daaqa ee Xukuumadda Federaalka Soomaaliya iyo Wasaaradaha xanaanada xoolaha ee Dowlad Goboleedyada ay uga hadleen sidii ay u wada shaqeyn lahaayeen Dowladda Dhexe iyo dowlad goboleedyada iyo in si wadajir ah looga wada shaqeeyo qorshaha xanaanada xoolaha Soomaaliya ee seddaxda sano ee soo socota,waxaana shirka maanta furitaankiisa goob joog ahaa Xildhibaano ka tirsan Baarlamaanka Soomaaliya.
Wakiilada ka socda Dowlad Goboleedyada ee shirka joogay ayaa ka hadlay muhiimada shirkan uu yahay iyo sidoo kale sida Wasaarada Xanaanada Xoolaha ee dowlada dhexe iyo kuwa maamul goboleedyada ay uga wada shaqeyn karaan horumarinta xanaanada xoolaha soomaaliya.
Agaasimaha Guud ee Wasaaradda Xanaanadda Xoolaha ,dhirta iyo daaqa ee Dowladda Soomaaliya Maxamed Cumar oo shirka furay ayaa ka hadlay muhiimada shirkan uu leeyahay oo uu tilmaamay in ay ka soo bixi doonaan hanaan Qaran oo ku aadan qorshaha lagu horumarin karo Xanaananda Xoolaha dalka.
Xildhibaan Cabdinaasir Siciid Muuse iyo Xildhibaan Sadiiq Warfaa oo labadaba ka tirsan Xildhibaanada Baarlamaanka Soomaaliya ayaa ku amaanay Wasaaradda Xanaanada Xoolaha ee dowlada dhexe iyo kuwa maamul goboleedyada sida ay uga go’antahay ka mira dhalinta qorshaha horumarinta Xanaanada Xoolaha.
Wasiirka Xanaanada Xoolaha Dhirta iyo Daaqa ee Dowladda Federaalka Soomaaliya Saciid Xsueen Ciid ayaa tilmaamay in qodobada ka soo baxa shirka ay noqon doonaan kuwa horseeda horumarinta Xanaanada Xoolaha, lana dhaqan gelin doono.
Shirkan oo socon doona mudo laba cisha ah ayaa lagu sii amba qaadi doonaa qodobo dhowr ah oo ka soo baxay shirarki horey loogu qabtay Muqdisho, waxaana ka qeyb galayaasha ay ka hadli doonaan horumarinta qorshaha Qaranka ee Xanaanada xoolaha Soomaaliya.
