Howlgalkan oo si wadajir ah u fulinayeen ciidamada Hay’adda Nabadsugidda, Booliska iyo Asluubta Soomaaliyeed iyo Booliska AMISOM ayay ciidamadu ka sameeyeen Xaafada Suuqa Xoolaha qeybta ka tirsan Degmada Yaaqshiid ee Gobolka Banaadir waxayna ciidamadu guri guri u baarayeen guryaha ku yaala Xaafadaasi.
Bartilmamaeedka howlgalka ayaa ahaa in ciidamadu gacanta ku soo dhigaan Maleeshiyaad ka tirsan Shabaab oo ku dhuumaaleysanayay xaafadda Suuqa Xoolaha.
Intii uu howlgalka socday ayaa ciidamadu waxa ay soo qab qabteen ilaa 100-qof oo looga shakisanaa inay ka tirsan yihiin Maleeshiyaadka Argagaxisada ah ee Al-Shabaab inkastoo markii baaritaan lagu smaeeyay dadkaasi intooda badan lasii daayay, marka laga reebo 5-qof oo ciidanka ay aqoonsadeen inay ka tirsan yihiin Argagaxisada Al-Shbaab.
Howlgalkan ayaa waxaa goobjoog ka ahaa kusimaha Taliyaha Hay’adda sirdoonka iyo Nabadsugidda Qaranka Sareeya Gaas Cabdullaahi Gaafow Maxamuud oo ay wehlinayeen Taliyaha Nabadsugidda qeybta guud ee Gobolka Banaadir iyo saraakiil kale oo katirsan Hay’adda Nabadsugidda.
Hay’adaha Amniga Dowladda Somaaliya oo kaashanaya Booliska AMISOM ayaa kordhiyay howlagalada dhinaca ammaanka ee ay ka sameynayaan Muqdisho, si ay uga hortagaan weerarada iyo dilalka looga bartay maleeshiyaadka Argagaxisada ah Al-Shabaab inay ku dhibaateeyaan shacabka Soomaaliyeed inta lagu duda jiro Bisha Barakeysan ee Ramadaan.
