Shacabka Galmudug ayaa gartay taageerada iyo tayaynta Ciidamada Maamul goboleedka Galmudug inay tahay xajinta iyo maamul wanaagga Galmudug,waxayna si Taageero ah maamulka ugu wareejiyeen Ciidan iyo gawaarida gaashaaman milateriga.
Madaxweynaha Maamulka Galmudug Cabdikariim Xuuseen Guuleed oo maalmihii ugu danbeeyay ku sugnaa magaalada Gaalkacyo ee Xarunta gobolka Mudug ayaa shacabka reer Galmudug ka Gudoomay Gawaaridda gaashaaman Hub iyo ciidanka ay shacabku ku wareejiyeen Maamulka uu madaxda ka yahay.
Kaddib Madaxweyne Cabdikarim ayaa salaan ka qaatay cutubyadii kamid noqday milateriga Galmudug,waxana uu ciidanka uga mahad celiyay sida Qalbi furaanta leh oo ay ugu soo biireen Ciidamada milateriga Galmudug.
Sidoo kale Waxaa goobjoog ka ahaa munaasabada wareejinta Hubka iyo Ciidamada kusoo biiray maamulka Galmudug odayaal,saraakiil iyo qeybo kamida bulshada reer Galmudug.
Madaxweynaha ayaa talaabadan ku tilmaamay mid ku dayasho mudan ahna mid taaba gelinaysa kor u qaadida adeega laga rabo maamul goboleedka Galmudug, dhisaysana niyada madaxda iyo Shacabka Galmudug.
