War uu soo saaray urur goboleedka IGAD ayaa lagu cambaareeyay weerarkii ay kooxda Al-Shabaab ku qaadeen hoteelka SYL ee magaalada Muqdisho oo ay ku sugnaayeen dimlomaasiyin Turkey ah maalintii Khamiista.
“Inkastoo ay shan qof oo ay ku jirtaan saddex ka tirsan ciidammada ammaanka ay naftooda ku waayeen fal dambiyeedka, haddana ma u suurta galin doonto inay joojiso burburka Al-Sabaab ee ah inay ka tirtirmaan taariikhda” ayaa lagu yiri war ka soo baxay IGAD.
Warka ayaa intaa ku daray in dowladda Soomaaliya iyo shacabkeedu ay ku howlan yihiin sidoo ay dib ugu dhisan lahaayeen waddankooda, taas oo caalamkuna uu garab ku siinayo.
“Soomaaliya waxay dhisatay dowlad federal ah, baarlamaan shaqeynaya iyo hay’ado ammaan iyo ciidammo difaac, waxaa dib u soo laabtay suuqyadii, goobaha waxbarashada iyo caafimaadka ayaa bixinaya adeegyadooda, taasi waxay caddeyneysaa in dagaal, rabshad iyo falal argagixiso oo ka dhaca dhulkan quruxda badan(Somalia) in ka badan 20 sano ay sii dhammaanayaan”.
IGAD ayaa warkooda ku sheegay in Al-Shabaab ay doonayaan inay carqaladeeyaan horumarka dalka Soomaaliya ayagoo sheegay inay ku guuldareysteen iny weerarrada ceynkaan ah fuliyaan intii lagu jiray shirkii wasiirada arrimaha dibadda IGAD oo laba toddobaad ka hor dowladda Soomaaliya ay ku marti galisay magaalada Muqdisho.
“Al-Shabaab sidoo kale ma awoodaya inay joojiyaan diyaar garowga soo dhaweynta madaxweynaha Turkiga Rajab Dayib Ordugan” ayaa lagu yiri warka IGAD.
Maalintii khamiista ayaa gaari walxaha qarxa laga soo buuxiyay lagu weeraray hotel SYL oo ay ku sugnaayeen wafdi Turki ah oo horudhac u ahaa wafdiga madaxweynaha Turkiga oo ku soo wajahan Muqdisho. Shan qof ayaa la xaqiijiyay inay ku dhinteen weerarkaas oo ay masuuliyaddiisa sheegteen maleeshiyaadka argagixisada ah ee Al-Shabaab.
