Golaha loo dhan yahay ee Qaramada Midoobay ayaa xalay cod u qaaday Mooshin lagu cambaareenayo cunaqabateynta ganacsiga oo uu Maraykanka muddada nus Qarniga ah saaray dalkaasi Cuba.
Mooshinkan ayaa waxaa codkooda ku taageeray 191 wadan, waxaana kasoo horjeestay Maraykanka iyo Isra’iil oo kaliya. Codeyntan ayaa markale muujineysa go’adoonka siyaasadeed oo uu xiligan ku jiro Maraykanka.
Dowlada Cuba oo taageeradan soo dhaweysay ayaa la yaab ku tilmaamtay in dowlada Maraykanka ay codkeeda ku diido in la qaado cunaqabateynta saaran Cuba, xilli uu soo hagaagayey xiriirka labada dal oo markii ugu horeysay dib usoo celiyey xiriikii diblumaasiyadeed.
Go’aanada kasoo baxa Golaha Loo dhan yahay ee Qaramada Midoobay ayaa inta badan ah kuwo aan kama danbeys ahayn, maadaama inta badan Awoodda UN-ka ay gacanta ugu jirto Golaha Amaanka (Security Council) halkaasi oo uu Maraykanka ku leeyahay codka qayaxan ee (VETO power).
Horaantii sanadkan ayey ahayd markii Madaxweyne Barack Obama uu sheegay in aan lasii wadi karin cunaqabateynta Maraykanka saaray Cuba, walow mooshinkan Qaramada Midoobay uu ka horyimid Maraykanka.
