Maxamed Cali Wakiili Gudoomiye ku xigeenka Baarlamaanka Iiraan ayaa si rasmi ah ugu dhawaaqay in Cudurka Coroona uu faroba’an ku hayo dalka Iiraan, isla markaana laga helay 4-xubnood oo ka tirsan xildhibaanada Baarlamaanka iiraan iyadoo la ogaaday kadib markii baaritaan caafimaad lagu sameeyey.
Wakiili wuxuu warbixintan kusoo daabacay barta uu ku leeyahay “Twitter-ka”, isagoo xaqiijiyay in afarta xildhibaan oo ka tirsan baarlamaanka ay kamid ahaayeen 30 qof oo baaritaan caafimaad lagu sameeyey, balse wuxuu diiday in magacyadooda la sheego.
Wasaaradda Caafimaadka Dowladda Iiraan ayaa dhankeeda ku dhawaaqday in tiradda dadka u dhintay cudurkan ay kor u dhaaftay 26 qof, sidoo kale dadka cudurkan laga helay ayay Wasaaraddu ku sheegtay inay gaarayaan 245 qof, kuwaas oo cudurkani ku dhacay iyagoo ku sugan gudaha dalka iiraan.
Fayraska Coroona ayaa markii ugu horraysay kasoo bilaabmay magaalada Wuhan ee dallka Shiinaha 12 December 2019, kaasoo xiligan soo dhaafay dalkaasi kuna faafay dalal badan oo caalamka kamid ah isagoo galaaftay nolosha kumanaan qof.
Ururka Caafimaadka Adduunka ayaa goor sii horeysay ku dhawaaqay xaalad degdeg ah oo heer caalami ah si looga hortago faafitaanka viruska, maadaama uu cudurku si deg deg ah u faafayo saacad kasta iyo maalin kasta loona baahan yahay in caalamku ka feejignaado.
Turjumidii : Zakariye Khaliif Faarax
