Wareegto xalay goor danbe uu soo saaray Boqorka Sacuudi Arabiya Salmaan Bin C/casiis ayaa isbadal iyo xil ka qaadis ku sameeyay Taliyeyaasha Ciidamada Boqortooyda Sacuudi Arabiya
Taliyayaasha uu Boqor Salmaan xilka ka qaaday ayaa kala ah Taliyeyaasha Ciidamada Difaaca, dhulka, iyo cirka, xilli dalka Sacuudigu uu horseed ka yahay dagaalka dhowrka sano socda ee ay kula jiraan xuutiyiinta Yaman.
Wareegtada Boqor Salmaan ka soo baxday laguma xusin sababta ka dambeysa in hal mar Taliyeyaasha Ciidamada Sucuudiga xilalka laga qaado, hase ahaatee waxaa laga yaabaa in ay xiriir la leedahay daba dheeraashada dagaalka Yemen oo Xulufada uu hoggaamiyo Sacuudiga ay xal millatari kaga gaari la’ yihiin dalka yemen.
Sidoo kale Boqor Salmaan ayaa isku shaandheyn ku sameeyay xubno ka tirsan Golaha Wasiirada Boqortooyada, waxaana markii u horeysay Boqortooyada Sacuudi Carabiya ay magacawday Wasiir qaabilsan arrimaha Afrika.
Boqortooyada Sacuudi Arabia waxaa ka socday muddooyinkii danbe isbadallo aan horay looga baran, taasi oo uu ka danbeeyo dhaxalsugaha Boqortooyada Maxamed Bin Salmaan oo ah Wasiirka Difaaca Boqortooyada Sacuudi Carabiya ahna nin da’yar oo siyaasado furfuran ku soo kordhiyay dalkaasi Sucuudiga oo boqolkii sano ee tagtay lagu maamulayay nidaam boqortooyo oo muxaafid ah.
