Gudoomiye ku-xigeenka maaulka gobolka Hiiraan ee dhinaca arrimha bulshada Sheekh Xuseen Cusmaan Cali oo manta kormeeray isbitalka weyn ee magaalada Beledweyne oo mudooyinkaan dawo la’aan baahsan ay ka jirto ayaa waxaa uu soo maray qaybaha kala duwan ee bukaanada ku jira isbitaalka.
Agaasimaaha isbitaalka Axmed Maxamed Qaliif ayaa sharaxaad ka siiyay guddoomiyaha sida uu isbitaalka uu hada ku shaqeeyo iyo xaalada dawo la’aan ee ka jirta isbitaalka, waxaana uu sheegay in uu qarka u saran yahay in uu xirmo, haddii aan la helin gurmad dhanka daawada ah.
“Isbitaalka waad u jeedaan qaybaha hada aan soo marnay, waxaa ka jirta dawo la’aan shaqaalaha ka shaqeeyo waa mushaar la’aan, haddii ay sidan ku sii socoto arrinta, waxaan qarka u saaranahay in isbitaalka albaabada la isugu dhufto dawo yari darteed” ayuu yiri Agaasimaaha isbitaalka Axmed Maxamed Qaliif
Guddoomiye ku-xigeenka maamulka gobolka Hiiraan ee dhinaca arrimaha bulshada Sheekh Xuseen Cusmaan Cali ayaa sheegay in isbitaalka uu yahay kan kaliya ee ay isticmaalaan bulshada reer Hiiraan iyo deegaannada kale ee ku xeeran gobolka, waxaana uu baaq u diray hay’adaha samafalka iyo Wasaaradda caafimaadka in gurmad deg deg ah lala soo gaaro.
Sheekh Xuseen Cusmaan Cali ayaa sidoo kale bulshada intooda wax heysata ka codsaday inay isku tashadaan oo ay gacan ka geystaan sidii dawo loo gaarsiin lahaa isbitaalka magaalada Beladweyne oo ay iminka ka jirto dawo la’aan.
