Magaalada jowhar ee xarunta gobolka shabeelaha dhexe oo ka mid ah deegaanada uu ka guray Wabiga Shabeele ayaa la soo sheegayaa in inka badan 200 oo bukaan uu soo ritay cudurka shuban biyoodka kadib markii sida uu maamulka sheegay ay dadkaasi cabeen biya aan nadiif ahayn oo meela ka mid ah wabiga ku haray,
Waxaana dadkaasi badankood laga keenay tuulooyinka hoos yimaada magaalada jowhar iyagoo la il daran xanuunka cudurka shuban biyoodka sida uu maamulka gobolka caddeeyay.
Guddoomiyaha gobolka shabeelaha dhexe Cali C/laahi Guudlaawe oo soo kormeeray qayba ka mid ah goobaha uu wabiga ka guray iyo isbitaalka guud ee magaalada Jowhar ayaa sheegay in biya la’aantii wabiga ay sababtay in Xoolihii ay dadku lahaayeen ay baaba’aan iyo cuduro soo ritay shacabka ku nool tuulooyinka hoos yimaada jowhar.
Guddoomiye Guudlaawe ayaa yiri “waxaa ka dhashay in xoolihii ay baaba’aan, waxaa ka dhashay in cuduro iyo in dadku ay cabeen biyaha meelaha yar yar ku haray ee wabiga taas oo keentay dad fara badan uu soo rito cudurka shuban biyoodka, waxaana la soo gaarsiiyay isbitaalka magaalada 289 qof oo bukaan ah, 2 ka mid ah way dhinteen, halka kuwa kale ay wali isbitaalka ku jiraan, qaarna ay bogsadeen”
Dhinaca kale guddoomiyaha shabeelaha dhexe Cali C/laahi Guudlaawe ayaa sheegay in gobolka ay abaaraha iyo biya la’aantu si daran u saameeyen islamarkaana ay dadku u baahan yihiin in gurmad dag dag ah lala soo gaaro,
Waxa uu tilmaamay in dhibaatadu ay hada ugu daran dhinaca deegaanada xeebaha ku yaala maaddaama dadka halkaas ku nool ay markii horaba Xoolana lahayn hadana ay noloshu ku adag tahay, isagoo ku celceliyay in dadkaasi la soo gaaro si noloshooda loo badbaadiyo.
Dhawaanahaan waxaa sii kordhaya cabashooyinka ka imaanaya gobolada dalka qaarkood haba u badnaadeene gobolada uu maro wabiga shabeele oo gabi ahaanba waqtigaan guray iyo sidoo kale gobolada dhinaca waqooyi galbeed ee Soomaaliya halkaas oo lagu soo waramayo in dad ay u dhinteen abaaraha ka jira.
