Munaasbad xariga looga jarayay daah furka mashruuca nalalka cad ceedda ku shaqeeya oo ay Wasaaradda Caafimaadka ka hirgelisay 8 xarumood oo ku yaala Muqdisho iyo meelo kale ka baxsan gobolka banaadir ayaa maanta lagu qabtay isbitaalka Madiina.
Xafladan oo ay soo qaban qaabisay Wasaaradda caafimaadka ayaa waxaa ka qeyb galay Agaasimaha guud ee Wasaaradda caafimaadka, mas’uul ka socday dowladda Norway iyo xubno kale.
Agaasimaha Isbitaalka Madiina Dr Maxamed Yuusuf oo hadal kooban ka jeediyay goobta ayaa sheegay in ay aad ugu faraxsanyihiin nalalka cad ceedda ku shaqeeya ee laga hirgeliyay isbitaalka, waxaana uu ka mahadceliyay mashruucan ay iska kaashadeen Wasaaradda caafimaadka iyo dowladda Norway.
Mr Reb-bron Hens oo ka socday safaaradda Norway ee Soomaaliya ayaa tilmaamay in Norway ay ka go’antahay caawinta bulshada Soomaaliyeed, wxaaana uu intaa ku daray inay sii wadayaan hirgelinta mashaariic kala duwan….cod
“Waan ku faraxsanahay in mashruucan aan hirgelino, anagoo kaashaneyna dowladda Soomaaliya, runti waa sida uu Agaasimaha idin sheegay, anaga waan waxa aan halkan u joogno in aan caawino bulshada Soomaaliyeed, waana arrin aad u fiican”
Agaasimaha guud ee Wasaaradda caafimaadka Cabdiqani Sheekh Cumar ayaa hoosta ka xariiqay in Wasaaradda Caafimaadku ay qeyb weyn ka qaadan doonto sidii ay ula shaqeyn lahayd xarumaha caafimaadka, isagoo dowladda Norway iyo hay’adda NIS foundation uga mahadceliyay taaba gelinta mashruucan.
Wasaaradda caafimaadka ee Xukuumadda Soomaaliya ayaa waddo qorshe ay ku horumarineyso adeegyada caafimaadka ee dalka, si bulshada ay u helaan gurmad caafimaad oo dhinac waliba leh.
