Xaflad si qurux badan ay u soo agaasimeen jaaliyada Soomaaliyeed ee magaalada Stockholm laguna soo dhaweynayey Wasiirka wasaarada qorsheynta iyo iskaashiga caalamiga ah mudane C/raxmaan Ceynte iyo wafdiga balaaran oo uu hogaamanyo ayaa lagu qabtay magaalada Stockholm ee xarunta dalka Sweden iyadoo ay ka qayb galeeen boqolaal jaaliyada ka tirsan.
Xafladan oo aheyd casho sharaf ayaa madax iyo wakiilo matayey bulshada Soomaaliyeed ee Sweden ay goobta ku soo dhaweeyay Wafdiga balaaran ee uu wasiirka Qorsheynta hogaaminayo, waxaa kaga xogwaramay xaalada guud ee dadka Soomaaliya ee ku nool sweden iyo sida ay ugu hamuun qabaan dalkooda hooyo, iyaga oo goobtana wasiirka ugu dhiibay talooyin wax ku ool ah iyo fariin ay ka wada sinaayeen bulshada reer Sweden oo ah in la helo safaarada ummadda Soomaaliyeed ku matasha Scanvina.m
Agaasimaha guud ee Wasaarada Warfaafinta iyo Dalxiiska mudane C/risaaq Cali Yuusuf Bahlaawi oo xaflada soo dhaweynta qeyb ka ahaa ayaa ka mahadceliyey sida quruxda badan ee reer sweden u soo dhaweeyeen, isaga oo amaanay isku duubnida iyo doorka ay ku leeyihiin qurba joogta dib u dhiska iyo horumarka dalka.
Wasiirka wasaarada Qorsheynta iyo Iskaashiga caalamiga ah mudane C/raxmaan Sh. Yuusuf Ceynta oo gunaanadkii xaflada la hadlay Jaaliyada Soomaaliyeed ayaa balan qaaday dhamaan farimihii iyo talooyinkii loo dhiibay in uu dalkii kula noqon doono , waxa uuna warbixin dheer ka bixiyey xaalada guud ee dalka dhinacyada siyaasada iyo horumarka muuqda, isaga oo ku celceliyey qurba joogto in ay yihiin kuwa kaalinta ugu weyn ka qaatay badbaadinta dadka Soomaaliyeed ee gudaha ku nool.
