Xaflad ballaaran oo ay ka qeyb galeen qeybaha kala duwan ee bulshada Soomaaliyeed iyo marti sharaf kale ayaa lagu qabtay magaalada Karachi ee koonfurta wadanka Pakistan.
Xafladaan ayaa ujeedadeedu aheyd sidii loo dooran lahaa hoggaanka jaaliyadda magaalada Karachi ee gobolka Sindh Pakistan, iyadoo hoggaankii hore xilkii ka dhamaaday , xafladfa waxaa soo qaban qaabiyey guddi ka kooban 7 xubnood kuwaas oo ay soo magacaabeen odayaasha magaalada Karachi dhaqaalaha ku baxayna waxaa bixisay safaaradda Soomalidu ku leedahay waddanka Pakistan oo ay hormuud ka tahay Danjiraha Soomaaliya u fadhiya wadanka Pakistan.
Waxaa ka hadlay xafladda gudoomiyaha guddiga qaban qaabada Abubakar Xasan Maxamed isagoo u mahad celiyey Danjiraha Safaaradda Soomalida ee Pakistan Khadiijo Al-makhsuumi iyo shaqaalaha safaaradda ee gacantii xoogga laheyd ka gaysteen qabashada xafladda, intaas kadib waxuu marti sharaftii loo qeybiyay jadwalka xafladda
Iyadoo la siiyay waqti kooban lasiiyey tar tamayaashii uu tartamayey hoggaanka jaaliyadda Karachi oo ahaa 4 musharax mid kastaana waxuu soo bandhigay waxa ay tahay in lagu doorto iyo waxa uu qabanayo haddii la doorto.
Codeynta oo aheyd mid qarsoodi ah ayaa lagu ridayey santuuq la dhigay dadka hortooda qof walbana arki karay, wareeggii koobaad waxaa iskugusoo haray laba musharax, iyadoo wareegi labaad uu ku guuleystay musharax Siciid Cabdi Kulane oo helay 74 cod halka C/fitaax C/qaadir Cismaan uu helay 71 waxaana guddigu sheegeen in Siciid yahay hoggaanka jaaliyadda Soomalida Karachi, tartamayaashii oo hadlay waxay qireen in cod bixintu aheyd mid xalaal ah kuna qanacsanyihiin natiijada doorashada.
Intaas kadib waxaa madasha hadal kooban ka jeediyey Dr. Xasan Hilowle oo ka mid ah ganacsatada magaalada isagoo la dar daarmay gudoomiyaha cusub inuu ku dadaalo u shaqeynta dadka oo dhan.
Gaba gabadii xaflada waxaa lagu doonsiiyey haddiyo sharafeed Danjiraha Soomaaliya ee dalka Pakistan iyo qunsulka magaalada Karachi u qaabilsan kuwaas oo aan madasha soo xaadirin uuna u gudoomay Axmed Faarax Ciidle Saki oo kasocday qunsuliyadda, waxaa kaloo iyana haddiyad sharafeed la guuddoonsiiyey guddigii ku meelgaarka ahaa ee jaaliyadda Karachi.
Ugu danbeyn guddoomiyaha cusub ee la doortay oo hadal kooban ka jeediyey madasha ayaa u mahad celiyey dhamaan kasoo qeyb galayaasha xafladda, waxuuna codsaday in lala shaqeeyo ee aan howsha isaga kaliya lagu haleyn.
Waa markii ugu horreysay ee Safaaradda Soomalida bixiso kharashaadka ku baxay xaflad Soomalida leedahay oo lagu qabto magaalada Karachi, taasoo dhamaan dadkii madasha ka hadlay u mahad celiyeen safaaradda kuna amaaneen Danjiraha.
Mursal Mohamud Osman
Karachi Pakistan
