Safaaradda Soomaaliya ee dalka Kenya ayaa ugu baaqday Jaaliyadda Soomaaliyeed ee ku nool Kenya in ay ka qeyb qaataan dhameystirka dhismaha dhulka safaaradda Soomaaliya ay ku leedahay dalkaas Kenya.
Safiirka safaaradda Soomaaliya ee ee dalka Kenya, Danjire Maxamuud Axmed Nuur (Tarsan) oo uu wehliyo safiir ku-xigeenka safaaradda ahna qunsulka 1-aad ee safaaradda, Mudane Suudi Saciid Suudi, ayaa maanta booqday Dhulka safaaradda Soomaaliya ay ku leedahay dalka Kenya.
Ujeedka booqashada mas’uuliyiintan ayaa aheyd u kuurgelidda halka uu marayo dhismaha dhulka safaaradda iyo baaq ay u jeedinayeen bulshada Soomaaliyeed oo ku aadanaa in ay ka qeyb qaataan dhameystirka dhismaha dhulka safaaradda.
Safiir ku-xigeenka safaaradda, Soomaaliya ee dalka Kenya, ahna qunsulka 1-aad ee safaaradda, Mudane Suudi Saciid Suudi oo Warbaahinta kula hadlay dhulka safaaradda Soomaaliya ee dalka Kenya ayaa ka codsday bulshada Soomaaliyeed ee ku nool Kenya in ay si hagar la’aan ah uga qeyb qaataan dhameystirka dhulka Safaaradda.
Sidoo kale Safiirka dowladda Soomaaliya u fadhiya dalka Kenya, Danjire Maxamuud Axmed Nuur (Tarsan) ayaa isna ugu baaqay Jaaliyadda Soomaaliyeed ee ku nool Kenya in ay ka qeyb qaataan dhameystirka dhismaha Dhulka safaaradda Soomaaliya ee dalka Kenya oo meel gabo gabo ah.
Dhulka safaaradda Soomaaliya ee dalka Kenya ayaa gacanta dowladda Soomaaliya ugu soo laabtay sanadkii 2010-ka kaddib dacwad dheer oo lala galay nin Hindi ah oo dhulkaasi iibsaday billowgii sagaashameeyadii.
