Munaasabad kooban oo lagu soo dhaweenayay afar boqol iyo kontan Arday oo kamid ah dufcadii labaad ee u fariista Jamacada Ummadda Tan iyo markii dib loo yagleelay ayaa waxaa ka qeybgalay Wasiirka Wasaaradda Waxbarashada iyo Tacliinta sare,Wasiiru Dowlaha Wasaarada Waxbarashada, Guddoomiyaha Jaamacadda Ummadda ,ku-xigeenadiisa , hormuudyada kuliyadaha Jaamacadda, arday iyo marti sharaf kale.
Guddoomiye ku-xigeenka dhanka waxbarashada ee Jaamacadda Ummadda Soomaaliyeed Mudane Aadan Guuleed Shabeel hadal kooban ka jeediyay xafladda ayaa ardayda u sheegay iney yihiin dad nasiib badan maadama ay u suura gashay ka gudbida imtixaanka lagu galayay Jaamacadda.
Gudoomiyaha Jaamacadda Prof Maxamad Axmad Jimcaale ayaa tilmaamay in sanadkaan ardayda xafladda loo sameynayo ay ka badan yihiin ardaydii sanadkii hore la qaatay, isagoo ku booriyay inay u istaagaan sidii ay uga faa’iideysan lahaayeen kuliyadaha kala duwan ee Jaamacadda ee ay doorteen.
WasiirkaWaxbarashada iyo Tacliinta sare Qadro Bashiir Cali ayaa ardayda u ujeedisay in Dadaalaan ,maadaama Jaamacaddu tahay mid adag oo aan ardayga lagula xisaabtami doonin lacag, balse xisaab tanka ka dhaxeeya ardayga iyo maamulka uu yahay cilmi, ay ka bartaan cilmiga ay u yimaadeen.
Qaar ka mid ah ardayda cusub ee ay Jaamacadda Ummadda qaadatay oo la hadlay Warbaahinta Qaranka ayaa sheegay inay aad ugu faraxsanyihiin ku soo biiridda Jaamacadda.
